DILI, 30 Dezembru 2025 (TATOLI)—Diresaun Nasionál Infraestrutura no Komunikasaun (DNIK) kontinua habelar konetividade dijitál nasionál, liuhusi implementasaun Projetu Konetividade Nasionál Faze VIII (NCP VIII), ne’ebé sei sai hanesan foku prinsipál serbisu DNIK nian durante tinan 2025 tomak.
Diretór Nasionál Informasaun no Komunikasaun, Ambrosio Amaral, dehan liuhusi NCP VIII, instituisaun Estadu 303 mak konekta ona rede internét fibra ótika nasionál, inklui sentru saúde 66 no eskola públika 76.
“Liuhusi NCP VIII ne’ebé iha, bainhira projetu tomak ramata, kuaze ajénsia Governu nian rihun ida iha Timór laran tomak mak sei iha ligasaun no utiliza ba rede konetividade ida-ne’e”, Ambrosio Amaral informa ba Tatoli, ohin.
Kona-ba kabu submarinu, tuir nia, iha loron 25 Novembru 2025, halo ona teste iha Bebonuk. Ne’ebé tuir orientasaun katak hahú 01 Dezembru 2025, ajénsia Governu nian 600-resin iha territóriu laran maka uza ona liña internét ne’ebé mai husi kabu submarinu.
“Ita haree kualidade internét nian agora lalais no estavel liu. Velosidade internét nian mós di’ak tebes kompara ho uluk”, nia hateten.
Projetu Konetividade Nasionál nu’udar programa estratéjiku Governu Timor-Leste nian ho objetivu atu harii no hametin infraestrutura rede nasionál internét nian, espesifikamente atu apoia dijitalizasaun Governu nian no hadi’a servisu públiku sira.
Projetu ne’e jere husi Diresaun Nasionál Infraestrtutura no Komunikasaun, iha Ministériu Transporte no Komunikasaun nia okos no implementa dezde 2008.
Liuhusi konstrusaun backbone rede fibra ótika nasionál, Governu hakarak atu aumenta kapasidade internét ne’ebé signifikante hanesan asesu ba konetividade ida to’o iha nivel munisípiu.
Infraestrutura ida-ne’e hein atu fó apoiu ba implementasaun servisu e-government, sistema administrasaun dijitál, no servisu públiku oioin ne’ebé bazeia ba online iha Timor-Leste.
Nu’udar implementasaun NCP VIII, DNIK afirma ninia kompromisu atu hametin fundasaun sira transformasaun dijitál nasionál nian hodi promove governasaun ne’ebé efisiente no modernu liután.
Notisía relevante: DNIK fasilita rede internet ba instituisaun Estadu 606 durante tinan 2024
Jornalista: Arminda Fonseca
Editora: Maria Auxiliadora
