iklan

EKONOMIA, HEADLINE

DNIK fasilita rede internet ba instituisaun Estadu 606 durante tinan 2024

DNIK fasilita rede internet ba instituisaun Estadu 606 durante tinan 2024

Sentru dadus DNIK iha Caicoli. Imajen Tatoli/Egas Cristóvão

DILI, 10 janeiru 2025 (TATOLI)–Ministériu Transporte no Komunikasaun (MTK) liuhusi Diresaun Nasionál Infraestrutura no Komunikasaun (DNIK) fasilita ona rede internet ba instituisuan Estadu hamutuk 606, iha territóriu tomak, durante tinan 2024 nia laran.

Diretór Nasionál Infraestrutura no Komunikasaun, Ambrosio Amaral, hateten, DNIK nia serbisu bazeia ba lei orgánika MTK artigu 17 ne’ebé akumula funsaun tolu importante hanesan responsabilidade konesaun ba infraestrutura rede fibra ótika ba ajénsia Governu hotu iha Timor-Leste, sai jestór distribuisaun bandalarga bandwidth internet ba instituisaun Estadu no sai servisu operasionál ba rejistu domain .tl.

“Iha parte infraestrutura nian, ita konekta ona rede internet ba instituisaun Estadu hamutuk 606 iha territóriu, iha tinan 2024,” Diretór Ambrosio Amaral, hato’o ba Agência Tatoli, iha Palásiu Governu, sesta ne’e.

Notísia relevante : DNIK fasilita ona infraestrutura rede internet ba instituisaun Estadu 559

DNIK hakarak foku ba konesaun infraestrutura rede fibra ótika nian iha tinan 2025.

“Ita sei konekta tan internet ba instituisaun Estadu hamutuk 303, ne’ebé husi númeru ne’e iha 66 mak hanesan sentru saúde no 70 ba eskola públiku, inklui postu administrativu sira hotu iha territóriu,” nia akresenta.

Desde tinan 2002, kapasidade liña internet iha de’it 512kbps, maibé daudaun kapasidade to’o ona 1Gb ka 1000mbps, ne’ebé distribui ba instituisaun Estadu sira.

Bandwidth internet nafatin ho  1Gb ka 1000mbps iha tinan ne’e no sei hasa’e ba 2Gb to’o 5Gb depende ba presu merkadu bandwidth ne’ebé iha.

“Ita espera projetu kabu submarinu fibra ótika ho kapasidade liña internet bele aumenta sa’e ba 800Gb iha faze dahuluk to’o 27Tb,” Ambrosio Amaral, tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!