BOBONARU, 03 Janeiru 2026 (TATOLI)- Polísia Nasionál Timor-Leste (PNTL), liuhusi Komandu munisípiu Polísia Bobonaru, hamutuk ho FALINTIL-Forsa Defeza Timor-Leste (F-FDTL) kompañia Tunubibi enserra Operasaun “Lilin-Mor 2” hodi asegura selebrasaun Natál 2025 no tinan foun 2026.
Komandante Polísia munisípiu Bobonaru, Superintendente Xefe Agustinho Gomes da Silva, afirma katak durante operasaun tomak situasaun orden públika iha área Bobonaru konduziva nafatin, maski mosu perturbasaun iha fatin balun, inklui asalta malu iha Balibó no Maliana ne’ebé la rezulta ema mate.
“Operasaun ne’ebé ita hala’o di’ak, maski iha konflitu, maibé ita halo esforsu hotu-hotu atu halo buat ne’ebé tuir ita-nia kapasidade ho profisionál bazeia ba lei no orden komandu”, Agustinho hateten iha Kuartél Komandu Polísia munisípiu Bobonaru.
Durante operasaun Lilin-Mor 2, forsa konjunta rejista atinjimentu oioin, inklui halo patrullamentu móvel hamutuk 81 no asegura serbisu no misa Natál nian iha fatin 33, inklui kapela, igreja, postu polísia, no fatin públiku sira seluk.
Durante ezekusaun diretiva Komandu F-FDTL no PNTL simu keixa 10 iha Kuartél Komandu, halo asaun represiva polisiál hodi detein ema na’in-lima ne’ebé konsidera perturba orden públika no viola lei. Aleinde ne’e mós apreende motorizada 10 – unidade hitu iha eskuadra Atabae no tolu iha Kuartél Komandu munisípiu Bobonaru.
Iha operasaun Lilin-Mor 2 iha área Autoridade Polísia munisípiu Bobonaru rejistu kazu fatál ida. “Ita haree hodi bainrua joven ida mate, tanba mout iha área marítima besik kosteira Palaka, suku Sanirin, postu administrativu Balibó”, dehan.
Superintendente Polísia ne’e relata katak PNTL mós rejista inséndiu iha suku Rairobo, postu Atabae, iha loron 30 Dezembru 2025. Rejista mós kazu ameasa rua ne’ebé ida envolve husi oknum PNTL.
“Ita halo asaun represiva hodi hasai kilat. Ida-ne’e envolve membru Unidade Espesiál PNTL lori Armas de Fogo ameasa komunidade. Kompañia Delta responde hodi dezarma no halo keixa. Agora kazu iha prosesu nia laran no suspeitu hetan ona Termu Identidade Rezidénsia no arma asegura iha kuartél kompañia Delta BOP UEP”, adianta.
Iha enserramentu forsa konjunta ne’e, Agustinho hato’o apresiasaun no agradesimentu ba membru PNTL tomak, Kompañia Delta UEP, no F-FDTL ba sira-nia dedikasaun no sakrifisíu tomak hodi asegura eventu nasionál ne’e no fiar katak operasaun ne’e sei sai referénsia ba futuru.
Notísia relevante: Joven sira atake malu, PNTL Balibo kaptura suspeitu na’in-hitu
Jornalista: Sergio da Cruz
Editora: Maria Auxiliadora
