DILI, 05 Janeiru 2026 (TATOLI) – Governu Malázia afirma katak iha tempu badak sei aprezenta proposta lei ida ba parlamentu hodi limita mandatu primeiru-ministru nian ba másimu tinan 10.
“Ami sei aprezenta proposta lei ida hodi limita mandatu primeiru-ministru nian ba la liu tinan 10, ka mandatu kompletu rua,” hatete hosi primeiru-ministru Anwar Ibrahim iha loron-segunda, 5 janeiru.
To’o agora, Malázia seidauk iha regulamentu espesífiku ida ne’ebé maka regula limite mandatu ba ema ida ne’ebé maka sai hanesan primeiru-ministru.
Iha Malázia nia sistema eleitorál, povu mak hili membru parlamentu sira. Partidu ka koligasaun ho kadeira barak liu iha parlamentu nomeia kandidatu ida ba primeiru-ministru, ne’ebé hafoin ne’e hetan pose hosi Liurai Malázia nian.
Primeiru-ministru hala’o mandatu tinan lima no bele mantein iha kargu bainhira nia iha konfiansa no apoiu hosi maioria iha parlamentu.
Ideia atu limita mandatu primeiru-ministru nian sirkula ona iha Malázia durante tinan balun, maibé nunka hetan diskusaun espesífiku.
Anwar subliña, pozisaun públiku hotu-hotu, inklui primeiru-ministru, tenke iha limite mandatu nian.
“SÉ sira hetan limite mandatu no sira bele hala’o sira-nia knaar, entaun di’akliu entrega sira ba jerasaun tuirmai,” nia hatete.
