DILI, 14 Janeiru 2026 (TATOLI)—Federasaun Futeból Timor-Leste (FFTL) planeia sei koopera ho autoridade munisipál hodi dezenvolve futeból iha kada munisípiu.
Prezidente FFTL, Nilton Gusmão esplika FFTL hala’o ona koordenasaun ho Ministériu Administrasaun Estatál (MAE) nune’e futuru halo kooperasaun ho Prezidente Autoridade Munisipál (PAM) sira hodi apoia atividade iha munisípiu ligadu ho dezenvolvimentu futeból.
“Ita agradese ba prezensa PAM sira hotu tanba hamutuk halo ona buat balun maibé ami fiar bá-oin ita sei halo buat barak tan iha munisípiu,” Nilton hateten iha Hotel Timor, Tersa (13/01).
Nilton rekoñese problema infraestrutura iha munisípiu sei sai preokupasaun hamutuk maibé la’ós sai dezafiu atu hala’o atividade futeból iha futuru liuliu joven sira no anima komunidade lokál hotu liuhusi atividade kompetisaun iha munisípiu.
Notísia relevante: Tasa Liga FFTL sei hahú iha semana oin
Nia relata liuhusi mandatu tinan-ida realiza ona kompetisaun Kopa Juveníl Sub-17 no Sub-15 hetan entusiazmu barak husi komunidade tanba fó apoia ba oan sira kompete iha kada munisípiu iha-ne’ebé justifika katak munisípiu presiza hetan atensaun.
“Ha’u fiar katak bainhira hala’o beibeik atividade ita sei atinje ita-nia mehi, tanba ho kontribuisaun PAM sira hotu sei lori susesu hodi dezenvolve futeból,” Nilton akresenta.
Entretantu, FFTL rasik hala’o ona atividade futeból hanesan kria kompetisaun Kopa Juvenil Sub-17 no Sub-15 kategoria mane no feto iha-ne’ebé kompetisaun referida hahú iha kada munisípiu no kontinua iha rejionál antes ramata iha nasionál.
Jornalista: Natalino Belo
Editór: Xisto Freitas da Piedade
