DILI, 13 Janeiru 2026 (TATOLI)–Kompetisaun Tasa Liga Federasaun Futeból Timor-Leste (FFTL) sei hahú abertura iha semana oin, 17 Janeiru.
Prezidente FFTL, Nilton Gusmão esplika kompetisaun referida hala’o ho objetivu nu’udár atividade pre époka antes atu hahú kompetisaun Liga nune’e kria kondisaun di’ak ba klube sira-ne’ebé partisipa kompostu husi klube primeira no segunda divizaun Liga Futeból Timor-Leste tinan 2025.
“Tasa ne’e tinan 2025 nian tanba klube sira maihusi rezultadu kompetisaun Liga 2025, mezmu eventu ne’e realiza iha inísiu tinan-2026,” Prezidente FFTL hateten iha Hotel Timor, Tersa ne’e.
Nilton informa Tasa Liga FFTL sei sai atividade regulár ne’ebé kada tinan sei hala’o iha-ne’ebé FFTL ajusta ona iha planu kalendáriu anuál nune’e klube sira iha netik kapasidade finanseira antes hasoru kompetisaun Liga iha Timor-Leste.
FFTL rasik hato’o apresiasaun ba prezensa entidade hotu liuliu klube sira tanba sai motivasaun ba dirijente federasaun liuliu atu kontinua organiza kompetisaun desportu futeból iha Timor-Leste.
“Liuhusi Tasa Liga FFTL bele nfusiona klube sira hodi hetan kbiit finanseira molok tama Liga,” Nilton subliña.
Iha fatin hanesan, Prezidente AD SLB atuál Primeiru-Ministru, Kay Rala Xanana Gusmão apresia ho inisiativa FFTL ne’ebé organiza ona kompetisaun Tasa Liga nune’e iha futuru sei hasa’e kualidade futeból Timor-Leste.
“Ami AD SLB sei partisipa, la’ós de’it ita atu manán de’it maibé futeból di’ak ba saúde, kamaradazen no relasaun di’ak ba malu,” Xanana Gusmão hateten.
Nia rekomenda atu FFTL akumula antigu jogadór sira-ne’ebé komprende futeból hodi hamutuk buka solusaun ba dezenvolvimentu futeból rai-laran hanesan hasa’e kualidade treinadór timoroan hodi lidera selesaun nasionál iha futeból.
FFTL rasik sei prepara prémiu orsamentu rihun $35 no taxa ba kampiaun Tasa Liga Federasaun Futeból Timor-Leste (FFTL) tinan-2025 ne’ebé tuir planu sei realiza iha 17 Janeiru no sei termina iha meiadu fulan-Fevereiru.
Entretantu, klube hamutuk 13 mak sei partisipa iha kompetisaun Tasa Liga FFTL kompostu Karketu Dili FC, Emanuel FC, Korasaun FC, AD SLB, Porto Taibessi, Assalam FC, DIT FC, As Marca, Aitana FC, Nagardjo, FIEL, Santa Cruz no Lika-Lika FC.
Jornalista: Natalino Belo
Editór: Xisto Freitas da Piedade
