BOBONARU, 20 Janeiru 2026 (TATOLI) – Anin akompaña udan ho intensidade boot iha segunda-feira, loron 19 Janeiru 2025, pur volta tuku 09h00 kalan, sobu uma ida iha aldeia Mologen, suku Oe-leu, postu administrativu Bobonaru, munisípiu Bobonaru.
Vítima afetadu, Mateus Sequeira, sente pániku tanba momentu anin sobu uma nia kakuluk ne’e sira na’in-hitu, membru família, iha hela uma-laran.
“Ha’u ho labarik na’in-rua mak iha uma-laran, kalan udan be ami atu toba ona mak de repente anin mai sobu tomak kalen. Ami mós hakfodak halai sai kedas husi uma-laran, uma mak estraga ho ami nia sasán no toba fatin no seluk tan, maibé ami laiha buat ida”, nia informa ba Tatoli, ohin.
Tanba ne’e, nia husu ba parte kompetente atu fó apoiu emerjénsia no rekuperasaun. “Agora ami hela iha família nia uma, tanba sei udan ho anin, ami seidauk bele halo buat ruma”, dehan.
Ba kestaun ne’e, Komandante Autoridade Protesaun Sivíl (APC, sigla portugés) Munisípiu Bobonaru, Zeca Michael, konfirma katak nia parte simu ona informasaun husi líder komunitáriu.
“Aban, ita sei bá fó apoiu rekuperasaun hodi hakman netik sira-nia nesesidade iha loron balun nian. Kona-ba estragu, ita-nia ekipa sei halo indentifikasaun”, salienta.
Tuir observasaun jornalista Tatoli iha terrenu, anin ho udan intensidade boot kontinua akontese iha suku Oe-leu no dadaun ne’e maioria komunidade lahalo atividade iha li’ur.
Notísia relevante: Anin-boot danifika saladeaula tolu iha EBC Tapo
Jornalista: Sergio da Cruz
Editora: Maria Auxiliadora
