BOBONARU, 20 Janeiru 2026 (TATOLI) – Anin no udan ho intensidade boot iha tersa-feira madrugada ne’e, pur volta tuku 05h00, sobu saladeaula tolu iha Eskola Bázika Sentrál (EBC, sigla portugés) iha suku Tapo, postu administrativu Bobonaru, munisípiu Bobonaru.
Eskola ne’e konstrui husi fundu projetu komunitáriu tinan 2015 nian. “Anin sobu saladeaula tolu iha EBC Tapo. Akontesimentu ne’e halo estudante sira pániku, inklui manorin sira”, Xefe suku Tapo, Xavier Barreto Cardoso, informa ba Tatoli via telefone.
Líder komunitáriu ne’e husu ba ministériu kompetente atu halo observasaun terrenu imediata, tanba provizoriamente ensinu no aprendizajen ladún la’o ho di’ak.
“Responde ba situasaun emerjénsia ninia, apenas materiál nune’e bele konstrui provizoriamente husi inan-aman sira, nune’e ita-nia oan sira kontinua prosesu ensinu no aprendizajen iha aula hanesan baibain”, nia sujere.
Xavier Cardoso hatutan katak ho dezastre naturál ne’e ameasa mós eskola foun ne’ebé konstrui husi fundu Programa Nasionál Dezenvolvimentu Suku (PNDS) siklu 7 iha tinan 2025 ho montante rihun $29.
“Eskola ne’e mós agora anin loke kalen tahan hitu ona. Hodi bainhira ne’e kedas ha’u organiza komunidade atu asegura obra ne’e, maibé tanba dezastre ho forsa maiór entaun hodi kalan loke tan kalen. Dalaruma mós sei la aproveita tan bainhira udan ho anin ne’e sei nafatin”, nia hato’o.
EBC Tapo akumula estudante sira husi suku Oe-leu no Leber no, tuir dadus tinan letivu 2025, totál estudante hamutuk 300-resin.
Notísia relevante: Projetu sala tolu iha EBC Tapo atraza
Jornalista: Sergio da Cruz
Editora: Maria Auxiliadora
