iklan

EDUKASAUN, BOBONARO, HEADLINE, MUNISÍPIU

Projetu sala tolu iha EBC Tapo atraza

Projetu sala tolu iha EBC Tapo atraza

Konstrusaun sala eskola foun tolu iha EBC suku Tapo, postu administrativu Bobonaro, munisípiu Bobonaro. Imajen Tatoli/Sérgio da Cruz.

BOBONARO, 08 maiu 2024 (TATOLI) – Implementasaun projetu konstrusaun sala eskola foun tolu iha Ensinu Báziku Sentrál (EBC, sigla portugés) suku Tapo, postu administrativu Bobonaro, munisípiu Bobonaro, progresu fíziku atraza, tanba hela de’it fulan ida-resin atu entrega, maibé to’o agora seidauk taka kakuluk.

Prezidente Grupu Komunitária atuál Diretór EBC Tapo, Rosalino Monteiro, justifika projetu ne’e la’o atraza tanba hahú implementasaun iha fulan outubru tinan 2023 hasoru kedas difukuldade oinoin, liuliu kondisaun klima la favorese.

Notísia relevante: ME sei konstrui-reabilita eskola 15 iha Bobonaro inklui EBC Tapo

“Sira halo servisu ne’e fulan-outubru 2023, atu hotu mak foin hahú tanba bee laiha, iha novembru normál, maibé iha dezembru udan ho anin-boot to’o janeiru-fevreiru 2024 servisu ladi’ak, ne’e maka atraza, foin iha fulan-marsu ne’e mak haka’as fila-fali, agora osan 50% ami hola hotu ona kalen, besi, simentu no seluk tan,” nia informa ba Ajénsia TATOLI iha Bobonaro, kuarta ne’e.

Nia informa, progresu fíziku ba obra ne’ebé tama iha kategoria Projetu Konstrusaun no Reabilitasaun Infraestrutura Eskolár (PKRIE) tinan 2023 ne’e atinje ona 50%, tanba reboka hotu ona, hein de’it ona atu taka kakuluk.

Nia deham, durante ne’e materiál lokál no fabrikadu kompletu hotu ona iha fatin projetu, maibé badaen sira mak seidauk iha vontade no tempu atu aselera serbisu.

“Sira ladún badinas, adianta hela de’it servisu, ho razaun oinoin, dehan ba halo kultura ida-ne’e, ida-ne’ebá, maibé ami tekan ba sira, horisehik sira mai ona, sóké problema ida tán mak agora udan hela, ahi mate entaun labele, tanba atu taka kalan ne’e presiza eletrisidade,” nia hateten.

Projetu referida ho durasaun kontratu fulan-neen ho totál orsamentu rihun $89-resin ne’ebé tuir loloos termina iha fulan-marsu liubá, maibé la konsege nune’e governu deside halo estensaun ba dala-ida tuir prazu katak sei termina iha fulan-juñu tinan ne’e.

Enkuantu obra referida implementa hafoin eskola tuan ne’ebé konstrui husi membri FALINTIL- Forsa Defeza Timor-Leste (F-FDTL) iha tinan 2017 ne’e, hetan estragus husi dezastre naturál anin-sibu totál kakuluk iha loron 31 fulan-dezembru tinan 2022.

Sala foun tolu ne’e sei akumula estudante terseiru siklu, ne’ebé remata ona estudu segundu siklu iha Ensinu BÁziku Filiál (EBF) suku Oe-leu, Tapo ho Leber no totál estudante iha EBC Tapo hamutuk na’in-335.

Notísia relevante: Anin boot sobu estraga eskola EBC Tapo

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!