BAUKAU, 05 Janeiru 2025 (TATOLI)—Autoridade Munisipál Baukau (AMB), Segunda ne’e, realiza reuniaun Konsellu Koordeansaun Munisipál (KKM) ne’ebé diskute kona-ba implementasaun Planu Dezenvolvimentu Munisipál (PDM) tinan 2025-2030.
Prezidente Autoridade Munisipál (PAM) Baukau, Veneranda Eurico Lemos Martins, esplika iha reuniaun referida parte téknika aprezenta planu PDM Munisípiu Baukau nune’e halo diskusaun liuliu simu sujestaun no opiniaun husi membru KKM nune’e bele atinje tuir meta no fó benefísiu ba komunidade.
“Halo aprezentasaun ba planu ida-ne’e halo hotu-hotu fó nia hanoin oinsá mak implementa ho di’ak nune’e fó benefísiu ba povu,” Veneranda Lemos hateten liuhosi komunikadu ne’ebé TATOLI asesu.
AleInde ne’e, iha reuniaun KKM Baukau diskute mós ajenda seluk hanesan halo korresaun ba naran suku no aldeia sira hotu iha Munisípiu Baukau hodi ajusta ba sistema tanba naran suku nian iha sistema laran diferente ho dokumentu eskritu nune’e difikulta prosesu sira burokrasia no administrasaun.
Antes ne’e, iha finde tinan 2025, ekipa husi husi nasionál halo ona levantamentu dadus naran suku no aldeia iha territóriu hotu hodi verifika no haloos hodi submete hikas ba sistema nune’e hafásil prosesu burokrasia.
“Ohin lista ne’e ami fó fila ba administradór postu no xefe suku sira atu lori hodi halo konfirmasaun loloos nune’e semana ida-ne’e bele submete ona ba nasionál,” Veneranda Lemos tenik.
Tuir regulamentu, reuniaun KKM realiza bazeia ba artigu 22 to’o 31 Dekretu-Lei númeru 3/2020 no Dekretu-Lei númeru 3/2016, artigu 4 to’o 41 ne’ebé totál membru prezensa 64 kompostu PAM, Sekretáriu Munisipál na’in-tolu, Diretór Serbisu Munisipál, Administradór Postu Administrativu no Xefe Suku sira.
Entretantu, PDM 2025-2030 iha Baukau foku ba setór haat inportante hanesan dezenvolvementu sosiál kompostu área edukasaun, saude no inkluzaun sosiál, dezenvolvementu institusionál liuhusi kapasitasaun liuliu formasaun no treinamentu, infraestrutura foku ba estrada, bee-moos inklui eletrisidade no setór ekonomia foku ba planu dezenvolvimentu agrikultura no turizmu.
Planu referidu bazeia ba PDM anteriór ne’ebé define katak vizaun Munisípiu Baukau iha futuru sai nu’udár sidade metropolitana maibé importante Baukau-oan hotu presiza fó liman no hanoin ba malu ka unidu hodi dezenvolve Baukau.
Jornalista: Natalino Belo
Editór: Xisto Freitas da Piedade
