OEKUSI, 05 Janeiru 2026 (TATOLI) – Diresaun Rejionál Edukasaun no Solidariedade Sosiál, Rejiaun Administrativa Espesiál Oekusi Ambeno (RAEOA), segunda ohin, selebra kontratu entensaun ho funsionáriu kazuál hamutuk na’in-263 inklui profesór 51 ba périodu fulan-neen tanba nesesáriu hodi apoia ensinu aprendizajén no atividade sira iha eskola.
Notísia relevante:PA RAEOA ‘promete’ sei la kontinua kontratu funsionáriu 29 iha ZEEDOA
Diretór Diresaun Rejionál Edukasaun no Solidariedade Sosiál, Vincêncio Cono, hateten, kontratu estensaun ne’e bazeia lei númeru 18/2023, fulan-Novembru 2023, terseira alterasaun ba lei númeru 3/2014, loron 18 fulan-Juñu, kona-ba kriasaun RAEOA no ZEESM, no rezolusaun Governu númeru 37/2025, loron 28 fulan-Agostu kona-ba nomeasaun Prezidente Autoridade RAEOA no membru autoridade sira.
“Diresaun estende funsionáriu sira-ne’e, tanba nesesita duni hodi apoia serbisu iha kada departamentu no eskola sira-ne’ebé menus profesór atu bele mellora serbisu administrasaun ho efisién no efikás iha instituisaun edukasaun,” Vincêncio Cono dehan, iha salaun Edukasaun Oekusi, ohin.
Nia relata katak, funsionáriu kazuál 263 ne’e, ba tékniku administrasaun hamutuk na’in-99, xefe GAT no ofisiál GAT hamutuk na’in-33, guarda eskola na’in-75, profesór na’in-51 no tékniku espesialista no planeamentu iha diresaun hamutuk na’in-lima.
Hatudu prestasaun serbisu ho responsabilidade
Iha biban ne’e, nia enkoraja funsionáriu kazuál sira, atu hatudu prestasaun serbisu ho responsabilidade la’os ho oportunidade, nune’e bele hadi’a administrasaun públika iha instituisaun edukasaun Oekusi.
“Ita mós hato’o agradese ba Prezidente Autoridade, tanba bele aprova pedidu ne’e, loloos labele estende tanba ligadu ho redusaun Orsamentu Jerál Estadu mai Oekusi, maibé serbisu edukasaun nesesáriu, entaun ita rekomenda atu kontinua estende tanba ba fulan-neen, hodi avalia mós dezempeñu funsionáriu idaidak, karik laiha melloramentu, posibilidade sei hakotu kontratu iha fulan-neen nia laran,” nia hateten.
Notísia relevante:“Funsionáriu deznesesáriu, la presiza atu kontinua”
Iha fatin hanesan, Xefe Departamentu Rekursu Umanu Diresaun Rejionál Edukasaun no Solidariedade Sosiál, Francisco Nono, klarifika katak, estensaun kontratu referidu bazeia despaisu husi Prezidente Autoridade RAEOA.
“Kontratu ne’ebé mak ami prepara ne’e, bazeia ba aprovasaun husi Prezidente Autoridade, daudaun ne’e ami sei tau kontratu kazuál, maibé ita iha hanoin ona atu kolabora ho Komisaun Funsaun Públika, atu prosesa ba futuru bele sai ona ajente administrasaun maibé ida-ne’e sei prosesu, parte tékniku rekursu umanu, ami só prepara dadus de’it ho termu kontratu ne’ebé hetan autorizasaun husi Prezidente Autoridade,” nia hateten.
Notísia relevante:PDHJ deteta funsionáriu barak iha Oekusi dezobidiente ba enkuadramentu legál
Jornalista: Abílio Elo Nini
Editór: Rafael Ximenes de A. Belo
