HNGV esforsu atu kombate Barata iha ospital laran
DILI, 05 Janeiru 2026 (TATOLI)—Xefe Gabinete Kontrolu Kualidade iha Hospitál Nasionál Guido Valadares (HNGV), Armenia da Conceição, hateten HNGV nafatin esforsu atu kombate Barata iha ospitál laran.
“HNGV servisu hamtuuk ho empreza internasionál ida iha tinan 2017 atu kombate Barata iha ospital nian no lakon duni, maibé ikus-ikus ne’e Barata mosu fila-fali. Entaun, ami hanoin katak ospital mezmu gasta osan barak maibé la konsegue rezolve problema Barata iha momentu ne’eba. Entaun, iha 2024, HNGV foti medida halo limpeza jeral hodi bele halakon barata sira ne’ebé mak iha armari ne’ebé mak tau iha pasiente sira-nia fatin,” Armenia da Conceição hateten ba jornalista sira iha nia kna’ar fatin HNGV, Bidau Tokoh Baru, ohin.
Nia esplika, Konsellu Diretivu HNGV hasai sirkular ida hodi fahe ba pasiente no nia familia sira kona-ba banhira lori hahan mai iha HNGV karik labele lori barak liu no banhira iha hahan restu sira labele soe arbiru no labele soe iha bee dalan sira, entaun ida-ne’e mak impaktu atu dada fila-fali animál sira-ne’e mai iha armari sira.
“Informasaun nafatin ami ko’alia ba pasiente sira banhira halo kontrolu ba enfermaria sira nafatin Fó informasaun ba pasiente sira, maibé dalabarak buat sira-ne’e akontese nafatin. Signfiika barata sira ne’e iha, entaun husi meiu ne’e ami nafatin iha sirkulár husi konsellu Diretivu katak limpezadór sira nafatin iha limpeza ba armari sira hodi hasai hotu ba li’ur no fase hamaran, Sira uza ai-mrouk rahun hodi nune’e hamate Barata sira. Nomós iha sirkulár ne’ebé mak fó sai katak limpeza jerál iha kada sesta-feira ba unidade hotu-hotu iha HNGV, entaun meiu saida mak ita halo nafatin mantein hodi asegura pasiente sira-ne’e, hodi bele livre husi infeksaun sira,” nia dehan.
Tanba ne’e, nia husu ba familia pasiente sira lori hahan mai labele barak, nune’e evita Barata labele mosu iha HNGV, tanba banhira lori hahan barak mai mak soe arbiru no bele hamosu Barata mosu fila-fali.
“Limpezador sira kontinua hamoos fatin ka unidade sira-ne’ebé iha, tanba sira hamoos tuir prosedura ne’ebé mak iha hahú husi armari, rai, kama, haris fatin to’o ba pesoal saúde sira-nia fatin mós sira hamoos. Maibé Barata mak kontinua mosu maibé ami nfatin halo limpeza jerál ba areadór HNGV, nune’e bele halakon Barata nee iha HNGV,” nia hateten.
Jornalista : Felicidade Ximenes
Editór : Cancio Ximenes
