KOVALIMA, 05 Janeiru 2026 (TATOLI) – Prezidente Autoridade Munisípiu (PAM), Kovalima fó hanoin ba dirijente eskola-sira atu ezekuta orsamentu konsesaun eskolár tuir matalan, tanba eskola balun nia janela no odamatan sei aat.
“Ha’u husu ba dirijente eskola atu haree ezekusaun orsamentu konsesaun eskolár tanba kada alunu iha direitu $2.00, nune’e orsamentu boot, maibé ho baze ba relatóriu katak eskola balun nia odamatan sei aat Vidru janela nakfera,” Autoridade Kovalima ne’e dehan iha salaun AMC, ohin.
Ho situasaun ne’e, Autoridade Kovalima orienta ba Diretór Servisu Munisipál Fiskalizasaun atu fiskaliza ezekusaun orsamentu konsesaun eskolár liuliu foku ba eskola balun nia odamatan no janela aat no atu sosa materiál ATK ba eskola sira liuhusi prosesu aprovizionamentu labele halo ajudikasaun direta.
Governu prevee orsamentu konsesaun eskolár ba 2025 ne’e, durante fulan-11 tanba prosesu konsesaun eskolár ba faze dahuluk ba fulan-neen ne’ebé maka nia utilizasaun eskola ensinu báziku no ensinu pré-eskolár ba fase dahuluk ho nia orsamentu hamutuk $185,765
Orsamentu konsesaun eskolár faze daruak ne’ebé orsamentu ba ensinu báziku rihun $143 no ba eskola pré-eskolár $7.572, nune’e eskola sira bele uza ba nesesidade eskola.
Governu atribui konsesaun eskolár ba pré-eskolár bazeia ba Dekretu-Lei númeru 84, artigu 7 ne’ebé altera husi Dekretu-Lei númeru 3/2016 kona-bá estatutu Administrasaun Munisipál no atribui konsesaun eskolár ba ensinu báziku tuir dekretu-lei númeru 32/2023, artigu 69 kona-ba gastu orsamentu konsesaun eskolár tuir nesesidade eskola.
Governu atribui konsasaun eskolár fahe ba kategória hanesan, konsesaun eskolár ba pré-eskolár ne’ebé responsabiliza husi Munisipál ho nia orsamentu kada estudante $0,75 no konsesaun eskolár ba ensinu báziku responsabiliza husi Ministériu Edukasaun ho nia orsamentu kada alunu $2.00
Jornalista: Celestina Teles
Editór: Florencio Miranda Ximenes
