Prezidente interinu Venezuela husu EUA atu kolabora iha ‘ajenda kooperasaun’
DILI, 05 Janeiru 2026 (TATOLI) – Prezidente Interinu Venezuela nian, Delcy Rodriguez, hatete iha domingu ne’e katak nia konvida Governu EUA nian atu serbisu ho nia nasaun hafoin asaltu ida hosi forsa Amerikanu sira iha ne’ebé Prezidente Nicolas Maduro ho nia feen hetan “kaptura” no lori ba Estadu Unida Amérika hodi hasoru akuzasaun kriminál sira.
“Ami konvida Governu norte-amerikanu hodi kolabora ho ami iha ajenda ida koperasaun nian ne’ebé orienta ba dezenvolvimentu fahe iha ámbitu direitu internasional nian hodi hametin konvivénsia duradoura komunitária nian,” nia informa liuhusi nota imprensa ne’ebé publika iha plataforma norte-amerikanu hosi rede sosial Instagram.
“Ami fó prioridade ba relasaun internasionál sira ne’ebé ekilibradu no respeitu entre Estadus Unidus ho Venezuela, no entre Venezuela ho nasaun sira seluk iha rejiaun, bazeia ba igualdade soberana no la-interferénsia”, nia hakerek.
“Prezidente Donald Trump, ami-nia povu sira no ami-nia rejiaun merese dame no diálogu, la’ós funu,” Rodriguez hatete, hodi hatutan: “Ida-ne’e sempre sai hanesan mensajen Prezidente Nicolás Maduro nian, no ida-ne’e maka mensajen hosi Venezuela tomak agora daudaun.”
Iha inísiu domingu, Trump, bainhira husu kona-ba Rodriguez, hatán hodi hatete katak nia “koopera hela”, enkuantu alerta mós katak nia “sei hasoru situasaun ida ne’ebé provavelmente aat liu duké Maduro” bainhira nia la halo ida-ne’e.
“Ami presiza asesu totál. Ami presiza asesu ba petróleu no ba buat sira seluk iha sira-nia rain ne’ebé permiti ami harii fali sira-nia rain,” nia hatete bainhira husu saida maka nia presiza hosi Rodriguez.
Maduro ho nia espoza Cilia Flores to’o iha Nova Iorke iha loron-sábadu kalan no hetan hela detensaun iha Sentru Detensaun Metropolitanu iha Brooklyn. Sira hasoru akuzasaun federál sira EUA nian ne’ebé liga ba tráfiku droga no alegadu kooperasaun ho gang sira ne’ebé dezignadu hanesan organizasaun terrorista sira.
Maduro nega ona akuzasaun sira, no ofisiál sira iha kapitál Venezuela nian, Karakas, husu ona atu kaben-na’in ne’e hetan libertasaun.
Notísia relevante: ONU avalia asaun militár Estadu Unidu iha Venezuela ameasa séria ba direitu internasionál
Fonte: Anadolu
