OEKUSI, 05 Janeiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Diresaun Rejionál Edukasaun no Solidariedade Sosiál, devolve fali fundu Programa Merenda Eskolár 2025 nian hamutuk rihun $138,444.60 ba kofre Estadu.
“Iha fulan-Outubru no Novembru 2025, ami devolve orsamentu programa merenda eskolár ba kofre Estadu hamutuk rihun $138,444.60,” Xefe Departamentu Apoia Asaun Sosiál Eskolar, Sancia da Costa Neves, iha asalaun Edukasaun Oekusi informa, ohin.
Nia esplika katak, fundu ne’e mai husi ensinu rua, Ensinu Pré-Eskolár (EP) hamutuk rihun $6,040.44, kabe ba estudante 846 tanba kada estudante $0,42 sentavu, Ensinu Báziku (EB) rihun $132,404.16 husi estudante 18.544.
“Ida-ne’e mak ami halo kanselamentu ba programa merenda eskolár ba fulan rua nian. Bazeia ba ami-nia proposta ba programa merenda eskolár ne’e ba loron efetivu 17, maibé sistema aprova orsamentu tarde, entaun orsamentu ne’e aprova iha loron 21 Novembru, entaun ami kansela implementa tanba loron efetivu atu ramata ona, tanba atu implementa bazeia ba kaléndariu programa merenda eskolár nian,” nia hateten.
Notísia relevante:Merenda Eskolár iha Oekusi kumpre padraun nutrisaun
Tuir ezekutiva ne’e, kona-ba relatóriu, parte edukasaun simu ona husi estabelesimentu ensinu sira, ne’ebé submete ho di’ak bazeia proposta orsamentu ne’ebé iha, maibé dalaruma sei iha fallansu balun, tanba ne’e eskola sira informadu ona, katak tinan ne’e tenke garantia atu hadi’a di’ak liután husi tinan kotuk nian.
“Ezemplu dalaruma ami halo verifikasaun ba sira relatóriu liu-liu resibu loja sira sempre sala dalaruma bazeia ba montante orsamentu maibé kontajén orsamentu mak sala, maibé ami parte tékniku nafatin esforsa hodi halo-reverifikasaun hamutuk ho parte eskola, nune’e bele hadi’a tanba ne’e orsamentu Estadu entaun tenke ezekuta ho transparánsia,” nia hateten.
Notísia relevante:Edukasaun Oekusi aloka rihun $410-resin ba programa merenda eskolár
Jornalista: Abílio Elo Nini
Editór: Rafael Ximenes de A. Belo
