DILI, 06 Janeiru 2026 (TATOLI)-Polísia Nasionál Timor-Leste (PNTL) iha knaar importante ne’ebé konsagra ona iha Konstituisaun artigu 147 atu defende legalidade demokrátika no garante sidadaun sira-nia seguransa internu.
Nune’e, deputadu Komisaun B ne’ebé trata Asuntu Negósiu Estranjeiru, Defeza no Seguransa, David Dias Ximenes ‘Mandati’, solisita ba PNTL atu hasa’e vizibilidade iha komunidade nia leet hodi prevene krime iha territóriu no la’ós akontese tiha krime no konfrontu mak foin iha prezensa polísia nian.
Nia preokupa katak iha períodu Natál no tinan foun mosu konflitu barak hanesan iha Ainaru, Manatutu-Laklo, Venilale-Baukaun no fatin seluk tan, nune’e nesesita duni atu hasa’e liután prezensa husi autoridade seguransa iha komunidade nia leet hodi halo prevensaun.
“Ha’u ko’alia beibeik ona, lalika bá to’o fatin sira konflitu, iha Dili laran de’it, kalan imi la’o took, polísia iha ka la’e? Agora dadersán iha tuku 7:00 to’o 10:00 polísia iha estrada, liu tiha ida-ne’e laiha, ne’e mak sira-nia papél dehan vizibilidade”, nia kestiona.
Deputadu husi Partidu Frente Revolusionária Timor-Leste Independente (FRETILIN) dehan mezmu tau ona kámara vídeo vijilánsia ka CCTV iha fatin públiku no risku konflitu, maibé presiza prezensa polísia nian. “La’ós mosu tiha ona krime mak bá ka’er. Loloos presiza prevene mezmu ema halo sala sempre iha, maibé tenta másima hodi minimiza, entaun esforsu ida-ne’e laiha vizibilidade”, dehan.
Deputadu ne’e husu mós atu tau atensaun ba profisionalizmu polísia bainhira mosu dezorden hodi atua tuir regra ne’ebé iha.
Iha fatin hanesan, deputadu husi Komisaun B, Natalino dos Santos, hateten iha selebrasaun Natál no tinan foun situasaun ein jerál di’ak, maibé iha munisípiu balun akontese konfrontu no polísia halo ona atuasaun no agora ninia prosesu investigasaun la’o hela no ramata tenke lori ba justisa hodi suspeitu sira bele responsabiliza ba aktu ne’ebé iha.
PNTL tenke kontinua alerta hodi kria pás, mantein lei no orden, tanba tama ona tinan foun atu dezenvolve rai ne’e presiza hakmatek.
Deputadu husi Partidu Kongresu Nasionál Rekonstrusaun Timorense (CNRT) ne’e sujere atu iha futuru polísia tenke mantein seguransa iha suku no bairru, liuliu komandu munisípiu hotu atu destaka membru sira iha eskuadra, postu, liuliu funsionamentu Ofisiál Polísia Suku (OPS) atu haree hamutuk ho Konsellu Polisiamentu Komunitáriu (KPK) ho autoridade lokál sira atu halo sensibilizasaun hodi sidadaun sira hatene nia direitu no devér hodi prevene konflitu.
Notísia relevante: https://tatoli.tl/2026/01/02/pntl-rejista-krime-neen-iha-ambitu-selebrasaun-tinan-foun/
Jornalista: Nelson de Sousa
Editora: Maria Auxiliadora
