VIKEKE, 06 Janeiru 2026 (TATOLI)—Komandante Polísia Nasionál Timor-Leste (PNTL) Munisípiu Vikeke, Superintendente Polísia António Rego Fernandes relata iha ámbitu simu tinan foun 2026 PNTL Munisípiu Vikeke rejista kazu konfrontu entre joven hamutuk neen (6).
“Durante selebra simu tinan foun iha 31 Dezembru 2025 kalan, atu simu tinan foun ita rejista kazu konfrontu entre joven ho joven iha Munisípiu Vikeke hamutuk neen (6) mak daudaun ne’e ita rejista no prosesa ba ona Ministériu Públiku (MP),” António Rego ba TATOLI iha ninia kna’ar fatin, Tersa ne’e.
Notísia relevante: Konfrontu iha Suku Afaloikai, autoridade orienta suspeitu responsabiliza abitante nia uma ne’ebé estragadu
Nia esplika kazu konfrontu neen ne’e maioria tipu kazu ofensa simples, iha-ne’ebé akontese iha Postu Uatulari rejista kazu hamutuk tolu (3) (husi kazu ne’e iha ida mak rezolve tuir família), rejista iha Postu Uatukarbau rua (2) no Postu Vikeke Vila rejista kazu ida (1).
“Kazu konfrontu tolu iha Postu Uatulari ne’e ho tipu kazu ofensa simples relasiona ho sunu fogete kona abitante balun hodi mosu dezentendimentu no bainhira PNTL ba atua, membru polísi mós hetan tuda no karreta patrullamentu nia vidru rahun. Nune’e, kazu sira-ne’e ami prosesa ona ba Ministériu Públiku (MP) no kazu ida mak rezolve tuir família,” nia subliña.
Tuir nia katak kazu sira-ne’e rejistadu maioria maihusi konsume alkol.
Enkuantu, António tenik, konfrontu ne’ebé akontese iha Suku Bahalaraua’in no Suku Bibileo, Postu Vikeke Vila, iha loron 01 Janeiru 2026, mosu konfrontasaun entre joven bainhira halo paseiu.
“Nune’e, PNTL bá halo atuasaun no lori vítima sira-ne’ebé kanek bá ospitál no kazu ne’e mós ami agora prosesa hela. Ema kanek hamutuk na’in ualu (8) kompostu husi Suku Bibileo na’in-lima (5) no Suku Bahalaraua’in na’in tolu (3). PNTL kaptura suspeitu na’in haat (4),” nia relata.
Aleinde ne’e, António hatutan, konfrontu ne’ebé akontese iha Suku Afalokai, Postu Uatulari, Polísia Nasionál Timor-Leste (PNTL) eskuadra Uatulari kaptura suspeitu hamutuk na’in-haat (4) no iha Suku Matahoi PNTL kaptura na’in-13.
Iha postu Uatukarbau rejista kazu agresaun fízika entre joven sira-ne’ebé hemu tua lanu hodi baku malu. Husi kazu ne’e, PNTL kaptura suspeitu na’in-rua (2).
Jornalista: Vitorino Lopes da Costa
Editór: Xisto Freitas da Piedade
