IGEADI orienta Brigada Bobonaru hasai sedimentasaun iha Estrada protokolu Karimbala
DILI, 07 Janeiru 2026 (TATOLI)—Prezidente Institutu Jestaun Ekipamentu no Apoiu Dezenvolvimentu Infraestrutura (IGEADI), Ana Paula da Cruz, informa daudaun ne’e nia orienta ona ekipa husi Brigada Bobonaru hasai ona sedimentasaun sira-ne’ebé foin dadauk rai monu taka metin Estrada protokolu iha Karimbala, Postu Administrativu Maubara, Munisípiu Líkisa iha 06 Dezembru 2025.
“Loos duni akontese erozaun ida iha parte Maubara-Karimbala nian hodi rezulta rai monu taka dalan protokolu ba transporte hodi halo movimentu ba-mai. Nune’e, horisehik ha’u foti kedas asaun imediata hodi haruka ekipamentu ba rezolve problema ne’e no hodi kalan karreta no motirizada sira kontinua halo fali movimentu,” Prezidente Institutu Jestaun Ekipamentu no Apoiu Dezenvolvimentu Infraestrutura (IGEADI), Ana Paula da Cruz, hateten ba Agência Tatoli liuhusi telefónika, ohin.
Nia hateten, ohin loron, ekipa destakadu sira sei mantein nafatin iha lokalizasaun hodi hasai tan sedimentasaun sira iha drainajen inklui moru protesaun tanba horisehik ekipa hasai provizóriu de’it iha estrada laran para fasilita movimentasaun.
“Ida seluk tan mak iha partd Miguir nian, kada tinan ami hasai nafatin sedimentasaun ne’ebé intupidu iha ponte, atu bee bele nalihun no suli tuir nia dalan. Ohin mós ha’u haruka ona ekipa atu hasai hotu tanba iha tersa (06/01) ne’e mosu inundasaun,” nia dehan.
Entretantu, nia hatutan, kona-ba dalan protokolu iha parte Laleia (Manatutu) nian ne’ebé ameasa atu kotu, husi parte IGEADI iha ona informasaun maibé sei hein koordenasaun ho Ministériu Obra Públika, atu deside fó kompeténsia ba empreza responsável ka IGEDI mak responsável.
Notísia Relevante: IGEADI normaliza estrada ligasaun Oe-leu bá Maliana
Jornalista : Alexandra da Costa
Editór : Cancio Ximenes
