BOBONARU, 02 Maiu 2025 (TATOLI) – Institutu Jestaun Ekipamentu no Apoia Dezenvolvimentu Infraestrutura, Institutu Públiku, (IGEADI, I.P sigla portugués), Brigada Maria Tapó normaliza hela estrada ligasaun husi suku Oe-leu, postu administrativu Bobonaru, bá kapitál Maliana hodi fasilita movimentasaun transporte públiku no privada.
Normalizasaun estrada ne’e daudaun to’o ona iha aldeia Anahun, suku Odomau, postu administrativu Maliana.
Notísia Relevante: Falta metru ida-resin, estrada iha Galisapulu atu kotu totál
“Ami kontente no hato’o obrigadu ba Governu ne’ebé hadi’ak netik ona ami-nia estrada ne’e. La di’ak liu ba mós ami sente ba bailoro ne’e bele la’o bá-mai ho diak, tanba karreta la tatidik ona. Foin lalais udan ne’e, estrada sira bee mak nakonu, balu ameasa atu kotu tan”, Bendita Moniz nu’udar komunidade hato’o ba Tatoli, iha Hali-Mesak, ohin.
Aleinde ne’e, komunidade Feliciano de Jesus Lopes rekomenda ba Governu atu tau prioridade ba estrada ne’e iha orsamentu tinan 2026 nian.
Tuir nia, Governu presiza konsidera tanba tinan-tinan IGEADI sempre halo normalizasaun, maibé iha tempu udan aat filafali.
“Ami agradese ba IGEADI tanba bele halo ona intervensaun hodi fasilita ami movimentu bá-mai, maibé tuir ami-nia hanoin, se bele halo estrada foun. Se la’e tinan-tinan halo normalizasaun, gasta de’it osan, uza la kle’ur aat fali ona, tanba normaliza ne’e taka de’it ho fatuk no rai, karreta boot liu aat fali ona”, dehan.
Notísia Relevante: Estrada diresaun Maliana-Bobonaru iha fatin tolu ameasadu kotu
Estrada diresaun Maliana bá postu administrativu Bobonaru, iha 2017, Ministériu Obra Públika, Ministériu Transporte no Komunikasaun, kontrata empreza lokál Vieramor Unipessoal Lda. hodi halo manutensaun ba estrada no ponte ho kustu millaun $2, maibé projetu ho karáter emerjénsia ne’e to’o agora seidauk finaliza no paradu, tanba Governu sei halo revizaun ba dezeñu no Bill of Quantity (BoQ).
Jornalista: Sergio da Cruz
Editora: Maria Auxiliadora
