DILI, 07 Janeiru 2026 (TATOLI)—Governu liuhusi reuniaun Konsellu Minsitru deside Elisa Maria da Silva sai Embaixadora Timor-Leste ba ASEAN, hafoin Ministru Negósiu Estranjeiru no Kooperasaun, Bendito dos Santos Freitas, aprezenta proposta ba nomeasaun foun embaixadora Timor-Leste ba ASEAN nian.
Vise-Ministra ba Asuntu ASEAN, Milena Maria Rangel, informa ohin sira nomeia embaixadora foun ba ASEAN nian nune’e prosesu sira-ne’e halo hela, entaun ohin iha esplikasaun balun kona-ba prosesu ASEAN tuir mai saida mak Timor-Leste presiza halo iha tinan hira nia laran.
“Aleinde ne’e mós Ministériu hotu-hotu hala’o hela sira-nia servisu ho kontinuidade tuir enkotru sira no kontinua nafatin implemeta roteiru sira,”, Vise-Ministra ASEAN ne’e informa ba jornlista sira hafoin ramata reuniaun Konsellu Ministru iha Palásiu Governu, ohin.
Nia dehan, roteiru perioridade dahuluk mak Timor-Leste konklui ona ka sai ona membru ofisiál ASEAN, iha tan roteiru prioridade daruak mak pozisaun lubuk ida sira implementa ho Estadu membru sira, ne’ebé agoraTimor-Leste halo hela akordu.
Iha biban ne’e, Vise-Ministra ba Asuntus ASEAN, Milena Maria da Costa Rangel, halo aprezentasaun ida ba Konsellu Ministru kona-ba senáriu no konsiderasaun estratéjika sira-neʼebé relasiona ho preparasaun Prezidénsia Timor-Leste nian ba ASEAN.
Iha sorin seluk, Ministra Finansa, Santina Cardoso, aprezenta proposta ba Konsellu Ministru delibera hodi nomeia Nicodemos dos Reis Pereira nu’udar Komisáriu Autoridade Tributária ba períodu tinan haat, ho konsiderasaun ba ninia kapasidade téknika ne’ebé hetan rekoñesementu no esperiénsia profisionál ne’ebé hatudu ona.
Jornalista : Alexandra da Costa
Editór : Cancio Ximenes
