DILI, 07 Janeiru 2025 (TATOLI)—Ministru Transporte no Komunikasaun, Miguel Gonçalves Manetelu, sei partisipasaun iha Sorumutu Ministrus ASEAN nian ne’ebé responsável ba área dijitál ba da-neen iha Hanoin ho tema”ASEAN iha Adaptasaun: husi konetividade infraestrutura ba konetividade intelijente”.
Tanba ne’e, Ministru manetelu mós halo aprezentasaun ida ba Konsellu Ministru kona-ba ninia partisipasaun iha Sorumutu Ministru ASEAN nian ne’ebé responsável ba área dijitál ba da-neen, iha Hanoi hahú husi 13 to’o 16 Janeiru 2026.
Reuniaun ida-ne’e nu’udar mekanizmu kooperasaun importante liuhusi ASEAN iha setór dijitál no hala’o kada tinan, ho objetivu atu define orientasaun estratéjika, promove polítika komún sira no mós hametin kooperasaun rejionál no internasionál iha ámbitu transformasaun dijitál no ekonomia dijitál.
Enkontru ne’e sei foka ba tranzisaun ba modelu konetividade intelijente, ho destaka utilizasaun dadus, intelijénsia artifisiál, inovasaun, governasaun dijitál, dezenvolvimentu abilidade dijitál no kontribuisaun setór dijitál ba dezenvolvimentu sosioekonómiku sustentável rejiaun nian.
Ajenda ne’e inklui enkontru funsionáriu importante sira, enkontru ministeriál sira ho parseiru diálogu sira, sesaun temátika no eventu paralelu sira, no mós aprezentasaun Planu Diretór Dijitál ASEAN 2026-2030 no atribuisaun ASEAN Digital Awards nian.
Nune’e, Timor-Leste nia partisipasaun importante tebes-tebes tanba marka prezensa dahuluk nasaun nian iha forum ida-ne’e nu’udar membru plenu ASEAN nian, hodi reforsa nia envolvimentu iha prosesu kooperasaun dijitál rejionál no permite nia atu akompaña didi’ak prioridade no tendénsia emerjente sira iha ámbitu transformasaun dijitál iha nivel rejionál no globál.
Jornalista : Alexandra da Costa
Editór : Cancio Ximenes
