DILI, 07 Janeiru 2026 (TATOLI) –Prezidente Donald Trump fó-sai iha loron-tersa ne’e katak autoridade interinu sira iha Venezuela sei entrega entre barríl millaun 30 to’o millaun 50 ho kualidade aas petróleu bá Estadu Unida Amérika (EUA.
Movimentu ne’e mosu hafoin forsa norte-amerikanu sira iha loron-sábadu kaptura Prezidente Venezuela Nicolás Maduro ho nia espoza, lori sira ba sidade Nova Iorke hodi hasoru akuzasaun kriminál droga nian.
Trump hatete katak mina-rai sei fa’an tuir folin merkadu nian, no nia sei kontrola rendimentu sira hodi asegura katak “uza hodi fó benefísiu ba povu Venezuela no Estadu Unida Amérika. Mina-rai sei transporta diretamente ba doka deskarga nian iha EUA liuhosi ró armazeinamentu sira, hatete hosi Prezidente Trump.
Sekretáriu Enerjia Chris Wright hetan knaar atu ezekuta planu “imediatamente”.
Anúnsiu ne’e fó-sai bainhira titan petrolíferu sira Amérika nian preparadu ba enkontru sira ho risku aas ho Trump iha White House hodi ko’alia kona-ba futuru indústria petrolífera Venezuela nian.
Empreza sira hanesan Chevron, ConocoPhillips no ExxonMobil hein atu hasoru malu ho Trump iha semana ida-ne’e nia rohan hodi ko’alia kona-ba posibilidade atu investe dolar biliaun resin hodi halo operasaun sira nasaun nian funsiona fali.
Hafoin atake sira hasoru kapitál no kapturasaun tuirmai Maduro nian, Trump hatete katak EUA sei dirije Karakas, Venezuela, to’o tranzisaun seguru ida bele akontese, hodi alerta katak nia “prontu atu halo atake daruak no boot liu” hasoru Karakas bainhira presiza.
Notísia relevante: TL preokupa ho situasaun iha Venezuela ne’ebé fó impaktu umanitáriu
