DILI, 08 Janeiru 2026 (TATOLI)—Governu liuhusi Sekretária Estadu Formasaun Profisionál no Empregu (SEFOPE, sigla porrugés) hamutuk ho família matebian, kinta ne’e, simu mate-isin traballadór Manuel Alburqueque, iha aeroportu internasionál Komoro, no Governu entrega ona mate-isin ba família.
Mate-isin ne’e transfere husi Koreál Súl hafoin hetan asidente mout iha tasi Jiseok-ri, Sadong-myeon, Geoje-si, iha 25 Novembru 2025.
Notísia Relevante: Traballadór timoroan Manuel nia mate-isin hetan ona
Diretór Jerál Sekretáriu Estadu Formasaun Profisionál no Empregu, Carlito do Rosário Cabral, hateten SEFOPE hato’o sentidu kondolénsia ho tristeza ba família matebian Manuel Alburquerque ho akontesementu iha serbisu fatin Korea Súl.
“Ita la espera buat ne’e atu akontese iha tempu servisu no la’ós família mesak mak lakon oan di’ak ida, maibé Governu liuhusi SEFOPE mós sente lakon joven produtivu ida,” Carlito do Rosário Cabral hateten ba jornalista sira iha Aeroportu Internasional Nicolau Lobato, Komoro.
Tanba ne’e, nia fó esperansa katak matebian sei sai eroi foun ba nasaun ida-ne’e no ba ninia família rasik.
SEFOPE sente lakon fiar ne’ebé fó ba nia hodi ba servisu iha Korea Súl no Governu, tanba nia ba servisu ho objetivu atu bele kontribui ba dezenvolvimentu ekonomia iha rai laran maibé Maromak nia planu oin seluk.
Reprezentante família matebian, Aleixo dos Santos, hato’o agradesementu ba Governu liuhusi SEFOPE ho ekipa sira hotu ho esforsu tomak hodi buka tuir maktoban to’o hetan no lori fila nia mate-isin mai Timor-Leste.
“Ami família la simu realidade ida-ne’e tanba durante ne’e matebian nu’udar aman daruak ba nia família uma laran, tanba nia inan nu’udar faluk no família fó fiar metin ba matebian servisu ho di’ak hodi hadi’a ekonomia família nian,” nia hateten.
Biográfia
Matebian Manuel Alburquerque moris iha 11 Julhu 1995, husi Aldeia Ria, Suku Haupu, Postu Administrativu Letefoho, Munisípiu Ermera.
Matebian hahú kursu dalen lian Korea iha Sentru Kursu Lian Korea Bekora iha 2019 to’o 2021. Nia tuir teste Computer Basic Test (CBT) iha 2020 maibé nia la pasa. Maibé nia kontinua tuir teste nafatin iha etapa daruak nian iha tinan 2021, nune’e nia pasa iha ezame.
Matebian hetan kontratu husi Kompañia Tha Ara Peskas no aranka ba serbisu iha Korea Súl iha 20 Novembru 2022 ho kontratu durante tinan tolu (3) semana ida (1).
Jornalista : Alexandra da Costa
Editór : Cancio Ximenes
