Inspetór Defensoria Públika halo investigasaun kle’an ba membru na’in-tolu
DILI, 08 Janeiru 2026 (TATOLI)–Ministru Justisa, Sergio Hornai, hateten, nia parte orienta ona Inspetór Defensoria Públika atu halo invetigasaun kle’an ba membru Defensór Públiku na’in-tolu ne’ebé suspeitadu viola estatu bainhira halo funsaun hodi fó asisténsia legál ba sidadaun iha Tribunál.
“Tenke halo prosesu, ha’u orienta katak iha duni suspeita ba ida-ne’e, entaun Defensoria Públika ne’e iha Konsellu Superiór hodi halo serbisu investigasaun atubele apura verdade, maibé ba ida-ne’e tuir informasaun husi Defensór Públiku Jerál katak sira komesa ona halo investigasaun tanba IX Governu konstituisionál nia objetivu prinsipál mak hatuur justisa loloos no konfiável ba sidadaun sira hotu para halo tuir,” Ministru hateten ba Jornalista sira iha ninia knaar fatin, Kolmera, Kinta ne’e.
Nia rekoñese katak durante ne’e Defensoria Públika hetan krítika husi sidadaun sira barak, maibé hanesan instituisaun Estadu tenke nafatin afirma ba problema sira ne’ebé mak ajente sira hasoru.
“Ba kazu ne’e tenke halo investigasaun kle’an atu nune’e bainhira investigasaun ramata, desizaun rekomenda ba Konsellu Superiór Defensoria Públika nian hodi bele deside,” nia akresenta.
Notísia relevante : Defensoria Públika suspende Defensór na’in-tolu tanba komete violasaun estatutu
Governante ne’e konsidera sidadaun sira nia krítika ne’e normál, tanba ne’e hanesan instituisaun Estadu tenke firme ba nia pozisaun.
“Kuandu ita apura faktus, provas mak hatudu duni, ne’e iha kompeténsia kabe ba Konsellu Superiór para halo desizaun. Ita tenke apoiu, ita labele halo kontráriu ba buat ne’ebé husi téknikamente mai husi kraik loos, ita halo buat ida-ne’ebé mak pelu kontráriu,” nia tenik.
Atu halo suspensaun ba ajente Defensoria Públika na’in-tolu ne’e kabe iha sistema autonómu tuir estatutu.
“Ba kestaun suspensaun ne’e tenke delibera ba Konsellu Superiór, ne’e kabe ba sistema autonómu iha estatutu Defensória Públika. Tanba sira iha orgaun deliberativa rasik oinsá sira deside, sira fó koñesimentu ba aktu ne’ebé mak sira delibera ba orgaun Defensoria Públika,” Governante ne’e katak.
Jornalista : Natalino Costa
Editora : Julia Chatarina
