INFPM aloka millaun $14 sosa ai-moruk iha 2026
DILI, 12 Janeiru 2026 (TATOLI)–Diretora Ezekutiva INFPM, Paulina Mendonça Maher, hateten iha tinan 2026 ne’e Institutu Nasionál Farmásia no Produtu Médiku (INFPM) aloka osan millaun $14 atu sosa ai-moruk, konsumíveis no ekipamentu farmaséutiku sira.
“Ami sei loke konkursu públiku ba akizisaun ai-moruk, no mos fó oportunidade ba empreza sira-ne’ebe iha prestasaun di’ak iha tinan 2025 atu kontinua sosa ai-moruk,” Paulina Mendonça hateten ba jornalista sira iha Kampung Alor, ohin.
Nia esplika, konkursu ne’e la’ós de’it ba empreza nasionál sira maibé mós ba empreza internasionál sira.
“Orsamentu Jerál Estadu ba tinan ne’e ba INFPM aumenta millaun $2 ba sosa ai-moruk kompara ho tinan kotuk.Objetivu aumenta orsamentu INFPM millaun $2 ba sosa ai-moruk tanba ai-moruk nia folin muda kada tinan,” nia dehan.
Nia afirma, ai-moruk ne’e sei sosa iha rai-li’ur hanesan iha nasaun Índia, Malázia, Xina, Austrália, Indonézia no Portugál.
Jornalista : Felicidade Ximenes
Editór : Cancio Ximenes
