MS klarifika la halo ezonerasun ba Prezidente INSPTL
DILI, 13 Janeiru 2026 (TATOLI)—Ministériu Saúde liuhusi Vise-Ministru Fortalesimentu Instituisionál Saúde, José Mango dos Reis, klarifika katak Ministériu Saúde la halo ezonerasun ba prezidente Institutu Nasionál Saúde Públika Timor-Leste (INSPTL).
Vise-Ministru hato’o kestaun ne’e relasiona ho informasaun ne’ebé mak públika iha mídia sosiál katak Ministériu Saúde halo ezonerasun ba dirijente sira iha Ministériu Saúde, tanba loloos ne’e Ministériu Saúde la halo ezoneirasun ba presidente Institutu Nasionál Saúde Públika Timor-Leste.
“Ohin, iha ha’u nia intervensaun ona katak pontu importante ba Prezidente INSP-TL foun ho estrutura vogál na’in-rua sira na’in-tolu (3) hanesan membru konsellu diretivu INSPTL foun atu nune’e bele iha dezempeñu di’ak liután. Tanba laiha ezonerasaun ba Prezidente INSP-TL sesante ne’e la’ós dehan sira la halo servisu lae, sira halo hela servisu sira-nia prestasaun di’ak dezde sira simu pose,” José Mango dos Reis ba jornalista sira iha Salaun Palásiu da Ginzas, ohin.
Nia relata, instituisaun hakarak haree katak ida foun ne’ebé mai ne’e bazeia ba sira-nia esperiénsia ne’ebé mak ida tuan hala’o ona.
“Tanba Prezidente INSPTL foun ho vogál na’in-rua (2), ne’ebé ba sira la’ós buat foun ida. Oinsá sira bele jere didi’ak instituisaun INSP-TL la’o di’ak liután. Ida-ne’e mak Ministériu Saúde nia hanoin, rekomenda hela ba estrutura foun atu bele hala’o, estrutura sesante ne’e Prezidente mak funsionáriu Públiku Ministériu Saúde nian, vogal na’in-rua ne’e servisu iha setór privadu ho parseiru dezenvolvimentu sira. Prezidente INSP-TL ho vogál na’in-rua nia mandatu sei ramata iha dia 31 Janeiru 2026,” nia dehan.
Kona ba ezonerasaun ba Prezidente INSPTL tanba mandatu sidauk hotu, nia dehan, ida-ne’e dezisaun husi Ministra Saúde nian.
“Tanba estrutura sesante ne’e hala’o sira-nia servisu ne’e tinan rua resin ona sira hala’o, nia razaun fundamentu hakarak ezonerasaun haree katak organizasaun hanesan INSPTL tenke servisu di’ak liután,” nia esplika.
Kona-ba Madalena Hanjam hanesan administradora fundu global iha Ministériu Saúde, nia la’ós Ministériu Saúde ezonera lae, ne’e kontratu mak hotu entaun kontratu mak termina ona.
“Ne’ebé iha definisaun rua mak la hanesan ezonerasaun ho terminasaun ba kontratu, entaun buat ne’e la hanesan, ne’ebé Madalena Hanjam tuir kontratu ramata ona tinan 2025. Maibé ida-ne’e desizaun Ministra nian, em nome Ministériu Saúde mak deside,” nia dehan.
Jornalista : Felicidade Ximenes
Editór : Cancio Ximenes
