DILI, 13 Janeiru 2026 (TATOLI)–Polísia Nasionál Timor-Leste (PNTL) liuhusi Diresaun Servisu Investigasaun Kriminál Nasionál (DSIKN) ezekuta mandadu Tribunál Judisiál Primeira Instánsia Dili (TJPID) ho NUC 086/25-PNSIK hodi halo buska, apreensaun no detensaun ba Reitór Universidade Nasionál Timor Lorosa’e (UNTL) João Martins no Vise-Reitór ba Asuntu Administrasaun Finansa no Administradór Jerál inklui kargu xefia na’in-haat seluk.
Iha Tersa (13/01) ohin pur vota tuku 09:00 dadeer DSIKN desloka ba UNTL hodi ezekuta Judisiál tanba iha indísiu ba krime falsifikasaun dokumentu no anotasaun téknika.
PNTL halo buska, apreensaun no detensaun ba suspeitu sira ne’e separadamente hanesan Reitór UNTL João Martins nia iha dadeer ne’e ho vontade koopera justisa ba DSIKN hodi entrega-an hodi submete ba detensaun.
Enkuantu, Vise-Reitór ba Asuntu Administrasaun Finansa no Administradór Jerál inklui kargu xefia na’in-haat seluk Polísia ba foti obrigatóriante iha sira-nia serbisu fatin, UNTL.
Notísia relevante : Reitór UNTL simu ona karta husi PNTL hafoin buska no apreensaun
Asaun ne’e lidera husi Xefe Operasaun Servisu Investigasaun Kriminál, Superintendente Asistente Polísia Mouzinho Correia.
Tuir observsaun Ajénsia TATOLI iha terrenu, nota katak Polísia mós ezekuta mandadu hodi rekolla evidénsia balun tan iha Gabinete Retordu no iha Dirsaun Jerál Administrasaun Finansa UNTL hodi nesesita ba investigasaun.
Hafoin Servisu Investigasaun Kriminál Nasionál ramata halo atividade ne’e, Polísia mós kontinua kedan ba halo buska no apreensaun ba iha Reitór UNTL, João Martins, Vise-Reitór inklui kargu xefia na’in-haat ne’e nia rezidénsia, nune’e bele rekolla tan evidénsia balun hodi nesesita ba prosesu investigasaun ba kazu ne’e.
Hafoin ne’e, Polísia lori Vise-Reitór no kargu xefia na’in-haat ba edifísiu Servisu Investigasaun Kriminál Nasionál Komandu Jerál PNTL Kaikoli hodi submete ba prosesu identifika, hafoin ne’e detein sira durante oras 72 hodi aprezenta ba Ministeriu Públiku hodi submete ba prosesu judisiáriu.
Antes ne’e, DSIKN ezekuta mandadu judisiál hodi halo buska, apreensaun no detensaun ne’e tanba Reitór UNTL, João Martins no Vise-Reitór inklui kargu xefia na’in-haat tanba interveniente sira presumível ba krime falsifikasaun dokumentu ka notasaun téknika ne’ebé akontese iha tinan 2024. Violasaun ne’e previstu iha artigu 303 husi kódigu penál Timor-Leste nian.
Artigu 303 (falsifikasaun ba dokumentu ka notasaun téknika) haktuir katak:
Alínea 1). Ema ne’ebé, ho intensaun atu halo aat ba ema seluk ka Estadu, ka atu hetan ba sira-nia an rasik ka ba ema seluk, benefísiu lejítimu:
- Fabrika dokumentu falsu ka notasaun téknika, falsifika ka altera dokumentu-ida, ka abuza asinatura hosi ema seluk hodi kria dokumentu falsu;
- Hateten ho falsu faktu legalmente relevante iha dokumentu ida ka notasaun téknika;
- Falsu atestadu, bazeia ba koñesimentu profisionál, tékniku, ka sientífiku, kona-ba kondisaun fíziku ka mentál ka kualidade ema ida nian, animál, ka sasán; d) Uza dokumentu ruma ka notasaun téknika sira ne’ebé refere iha parágrafu anteriór sira, fabrikadu ka falsifika ka hasai hosi ema seluk; sei hetan pena prizaun to’o tinan-tolu ka multa.
Alínea 2) Kualkér asaun disruptiva iha dispozitivu tékniku ka automátiku ne’ebé maka hetan influénsia ba rezultadu notasaun nian hanesan ho falsifikasaun notasaun téknika nian.
Alínea 3) Kualkér tentativa bele hetan kastigu.
Jornalista : Natalino Costa
Editora : Julia Chatarina
