DILI, 14 Janeiru 2026 (TATOLI)—Ministériu Interiór (MI) hahú rezolve funsionáriu Diresaun Nasionál Proteje Patrimóniu Públiku (DNPPP) nia pagamentu adisionál ne’ebé molok ne’e hetan problema.
“Sim hahú tiha ona, ami espera katak ramata tan sira-nia saláriu sira sei hetan tan desimu terseiru (pagamentu adisionál),” Ministru Interiór, Francisco da Costa Guterres, hato’o ba Jornalista sira hafoin partisipa iha reuniaun Konsellu Ministru, iha Palásiu Governu, Kuarta ne’e.
Governante ne’e garante, parte ministériu sei la halakon funsionáriu sira-nia direitu.
“Prontu ne’e ninian direitu sei labele lakon, se ita halakon ema-nia direitu ita sala boot. Ho orsamentu ne’ebé ami iha, ami hasai uluk sira-nia desimu terseiru, ami rezolve uluk ne’e depois ami halo analize ba ami-nia orsamentu ne’e, se la to’o ba depois ami haree fali. Ami halo fali jestaun interna para depois kobre fali saláriu ida ikus fali,” nia akresenta.
Notísia relevante : Ministru Interiór promete sei rezolve funsionáriu DNPPP nia saláriu
Ministru nafatin koordena ho parte tékniku sira hodi haree disponibilidade pagamentu.
Ha’u seidauk bele ko’alia hasai husi item ida-ne’ebé, tanba tékniku ne’ebé ha’u seidauk bele ko’alia, ha’u ladún hatene, mas ha’u fó orden ne’e tékniku, ha’u fó orden ba sira ne’e tenke selu. Pagamentu ne’e husi Orsamentu Jerál Estadu 2026 ninian,” nia katak.
Liután, pagamentu ne’e la fó implikasaun ba pagamentu adisionál sira ne’ebé sei halo fulan ikus tinan 2026 ne’e.
“Ida-ne’e laiha implikasaun ida iha fim do Ano. Ami bele jere hela, di’ak hela,” Ministru tenik.
Jornalista : Natalino Costa
Editora : Julia Chatarina
