DILI, 14 Janeiru 2026 (TATOLI)—Diretór Jerál Servisu Nasionál Ambulánsia Emerjénsia no Médikamentu, Institutu Públiku (SNAEM, I.P), Simplicio Amaral, informa husi 15 Dezembru 2025 to’o 13 Janeiru 2026 ne’e, SNAEM halo atendementu ba veteranu benefisiáriu ba pagamentu pensaun kombatente 2009 me’ebé hein fixa-fanília iha Ministériu Asuntu Kombatente Libertasaun Nasionál, hamutuk 55.
“Dadus transferénsia veteranu nian, ita-nia ekipa sira sei stanby ha MAKLN ne’ebá até agora, ita atende ona pasiente hamutuk 55 durante sira simu osna iha edifisiu MAKLN ne’e,” Diretór Jerál Servisu Nasionál Ambulánsia Emerjénsia no Médikamentu, Simplicio Amaral, hateten ba jornalista sira iha nia kna’ar fatin, Kaikoli, ohin.
Nia informa, husi númeru ne’e laiha ida mak grave maibé sira balun mai ho kolen no mós aproveita koko sira-nia tensaun.
“Pasiente na’in-55 ne’e grave laiha maibé sira mai kontrola de’it sira-nia kondisaun, balun mai koko tensaun, balun mai simu ai-moruk no balun haluha sira-nia ai-moruk tensaun, entaun sira aproveita simu ai-moruk iha ne’ebá. Maibé 55 pasiente nee até agora ita seidauk haruka ba iha HNGV, sira hotu atende de’it iha ne’ebá, iha atende de’it iha tenda ne’ebé mak ita estabelese iha ne’ebá,” nia hateten.
Nia esplika, karik haree ba kondisaun ladún di’ak mak ekipa sira halo transferénsia ba Sentru Saúde Komoro.
“Karik ladi’ak mak ita kontínu haruka ba Sentru Saúde Komoro, tanba sira mak dudu malu mak sira dezmaia ita haruka ba iha Sentru Saúde Komoro atu halo atendimentu iha ne’eba,” nia esplika.
Antes ne’e Ekipa SNAEM.IP ne’ebé mak destaka iha edifisu MAKLN Ana Paula hatete, veteranus segundu registu iha 2009, mai husi Munisípiu atu simu fixa pagamentu tanba iha fatin refere antrian entaun halo benefisiariu sira monu ho nune’e ekipa SNAEM kontínua halo atendimentu.
“Benefisiáriu ba pagamentu pensaun kombatente 2009, ne’ebé antrian ba fixa pagamentu iha Ministériu Asuntu Kombatente Libertasaun Nasionál, ne’e iha ema na’in-10 mak monu. Tanba sira-ne’e kolen no hamriik kle’ur, moras no balun hamlaha tanba husi dook mak mai maibé laiha ida mak grave,” nia dehan.
Notísia Relevante:
Jornalista : Felicidade Ximenes
Editór : Cancio Ximenes
