DILI, 15 Janeiru 2026 (TATOLI)— Sekretária Estadu Formasaun Empregu liuhusi Diresaun Nasionál Empregu Estranjeiru (DNDEE) rejista númeru traballadór timoroan hamutuk na’in-18 mak hetan dezastre bainhira hala’o servisu iha Korea Súl hahú husi 2009 to’o 2025.
Notísia Relevante: Governu entrega mate-isin traballadór Manuel Alburqueque ba família
Diretór Jerál SEFOPE, Carlito Rosário Cabral, hateten durante ne’e Governu liuhusi Sekretáriu Estadu Formasaun Profesional no Empregu (SEFOPE) halo kooperasaun ho Governu Korea hodi haruka traballadór timoroan ba servisu iha área tolu hanesan peska, fábrika no agrikultura.
“Husi 2009 to’o 2025, traballadór timoroan hamutuk ema na’in-18 mak lakon vida iha Korea tanba hetan dezastre iha rai-maran, taasi laran no inklui mós balun hetan moras,” Diretór Jerál SEFOPE, Carlito Rosário Cabral, hateten ba jornalista sira iha Timor Lodge, Komoro, ohin.
Kauza sira-ne’e iha tanba dalaruma traballadór balun lori motor mak hetan dezastre iha estrada, nune’e mós traballadór balun hetan dezastre iha tasi laran tanba ladun iha koñesementu ba nani tasi.
Tamba ne’e, SEFOPE husu ba traballadór timoroan sira-ne’ebé servisu iha Korea tenke kuidadu an, bainhira atu ba serbisu iha tasi no mós iha rai-maran, hanesan foin lalais akontese traballadór timoroan ida mout iha tasi.
Diretór Diresaun Nasionál Empregu Estranjeiru, João Correia, hatete tuir dadus husi DNEE kona-ba traballadór timoroan sira-ne’ebé hetan dezastre iha rai-maran no mós iha tasi hodi lakon vida bainhira servisu iha Korea hamutuk na’in-18.
“Ita hotu hatene katak traballadór timoroan sira ba servisu iha ne’ebá kondisaun di’ak maibé buat ida dezastre ne’e ita la hein. Foin lalais ne’e iha traballadór timoroan ida maka sofre defisiénsia psikolojia (moras mentál) ne’ebé foin fila mai Timor-Leste,” nia hateten.
Daudaun ne’e, timoroan ne’ebé servisu iha Lorea hamutuk 7.744 no iha ema1046 mak fila ona mai Timor, traballadór hetan asidente hamutuk na’in-18 no sofre psikolojia (moras mentál) hamutuk na’in-ida (1).
Jornalista : Alexandra da Costa
Editór : Cancio Ximenes
