DILI, 15 Janeiru 2026 (TATOLI)–Primeiru-Ministru (PM), Kay Rala Xanana Gusmão,0 hateten Governu halo ona diskusaun iha Konsellu Ministru kona-ba alterasaun daruak ba Lei Partidu Polítika no sei haruka ba Parlamentu Nasionál hodi diskute no halo aprovasaun.
Notísia Relevante: KM aprova proposta-lei alterasaun daruak kona-ba lei partidu polítiku
“Ami diskute ona problema Lei Partidu Polítika nian, Lei Partidu Polítika tanba ita rai demokrátiku, ita labele dehan katak Prezidente ba Partidu ida só ha’u-nia família de’it mak bele troka, ema seluk labele tama, ida ne’e sala, ida-ne’e monarkia ne’e, tenke impede tiha buat hanesan ne’e. Ami aprova ona hein haruka ba Parlamentu atu halo aprovasaun tanba ne’e Lei,” Xanana hateten ba jornalista sira hafoin ramata enkontru ho Xefe Estadu José Ramos-Horta iha Palásiu Prezidensiál Nicolau Lobato, Bairru Pite, ohin.
Nia dehan, iha Lei ne’e mós bandu atu Sede Partidu labele sai fali ba uma Arte Marsiál nian.
“Sede Partidu nian labele sai fali ba uma Arte Marsiál nian. Sé mak hakarak mai tenke tama ida-ne’e, tama ida-néba labele, hanesan ne’e labele, tenke nakloke ba ema hotu. Ida-ne’e mak Lei ba Partidu polítika ne’ebé ami aprova ona, haree mak ba Estatutu Partidu Polítika no seluk tan,” Xanana tenik.
Aleinde ne’e, Governu haree mós ba Lei eleitorál tanba iha tinan 2027 ba oin sei iha eleisaun ba Kamâra Munisipál. Lei eleitorál mós husu ba Partidu Polítika hotu bainhira atu kompete iha eleisaun jerál no munisípiu pelomenu sede tenke iha munisípiu hotu.
Konsellu Ministru aprova projetu Proposta-Lei ne’ebé aprezenta husi Ministru Administrasaun Estatál, Tomás do Rosário Cabral, kona-ba alterasaun daruak ba Lei nú. 3/2004, 14 Abril, Lei sobre Partidu Polítiku.
Inisiativa lejizlativa ne’e ho objetivu atu hametin natureza demokrátika interna partidu polítiku nian no prevene ligasaun naran partidu polítiku sira nian ho naran organizasaun rezisténsia nian.
Jornalista : Hortencio Sanchez
Editór : Cancio Ximenes
