BALI, 15 Janeiru 2026 (TATOLI) – Sekretáriu Estadu Komunikasaun Sosiál, Expedito Loro Dias Ximenes no Xefe Instituitu Radiodifuzaun Públika, Rádiu Repúblika Indonézia Taufan Pamungkas Mahendra Jaya. Objetivu prinsipál husi media tour ne’e hodi hasoru diverjénsia mídia no transformasaun dijitál.
Sekretáriu Estadu Komunikasaun Sosiál, Expedito Dias Ximenes sente onradu tanba estrutura Rádiu Repúblika Indonézia (RRI) nian iha Bali, simu delegasaun husi Timor-Leste ho di’ak tebes.
Mídia ne’ebé hola parte iha Media Tour ne’e mai husi RTTL, Ajénsia TATOLI, STL, Timor Post, Dili Post, SAP News, VIP TV, SMNews, Jornál INDEPENDENTE no GMN.
Expedito Dias Ximenes dehan, media tour ne’e nu’udar programa 2025 nian ne’ebé foin implementa iha Janeiru 2026, tanba programa ne’e hala’o kada tinan.
Objetivu husi media tour ne’e hodi haree dezenvolvimentu iha diverjénsia mídia no transformasaun dijitál.
“Tinan ne’e ami halo iha Bali tanba konñesidu iha mundu iha área turizmu nian, ita mós profisaun hanesan, ami hakarak haree direita tranformasaun dijitál iha Bali. Ami haree transformasaun LPP RRI Denpasar bele sai referénsia ba ami, maibé transformasaun iha ami-nia rain mós la’o maka’as tanba mídia hotu-hotu tama ona iha dijitalizasaun, tantu mídia estatál no mídia privadu sira, ami mós iha rádiu komunidade hamutuk 22, hotu-hotu tama ona dijitalizasaun.”
“Ba Timor-Leste transformasaun dijitál importante tebes, tanba ne’e bele halo komunikasaun entre nasaun, ohin vizita iha RRI Denpasar ne’ebé la’o maka’as ona iha transformasaun dijitalizasaun,” Sekretáriu Estadu Komunikasaun Sosiál, Expedito Loro Dias Ximenes, ko’alia iha RRI Denpasar, Bali, kinta ne’e.
Sekretáriu Estadu Komunikasaun Sosiál, Expedito Loro Dias Ximenes no Prezidente RTTL halo ona akordu kooperasaun entre Timor-Leste ho RRI Sentrál iha Jakarta.
“Rezultadu husi akordu kooperasaun ne’e mai atualiza ho RRI Kupaun no Atambua ami halo programa transmisaun konjuta iha área fronteira, programa ne’e la’o hela, tanba ne’e parte RTTL bele mai aprende iha RRI Bali. Iha ami-nia konstituisaun garante Liberdade imprensa no Liberdade espresaun
Instrumentu diplomátiku hodi harii kompreensaun no konfiansa entre nasaun
Xefe Rádiu Repúblika Indonézia, Denpasar, Institutu Rádiudifuzaun Institututu Públiku, Taufan Pamungkas Marhaendra Jaya, kontente ho vizita Sekretáriu Estadu Komunikasaun Sosiál, Expedito Loro Dias Ximenes no mídia Timor-Leste nian.
“Ami hakarak hato’o bemvindu ba ita-boot sira iha Rádiu Repúblika Indonézia (LPP RRI) iha Denpasar. Ida-ne’e hanesan onra no ksolok ida ba ami atu simu vizita amizade ida-ne’e ba illa Bali. Illa ida-ne’ebé tane aas valór sira abertura nian, diálogu no armonia entre nasaun sira.”
“Ami interpreta vizita ne’e nu’udar manifestasaun ida hosi relasaun forte entre Indonézia no Timor-Leste, partikularmente iha área komunikasaun no radiodifuzaun nian. Iha era atuál transformasaun dijitál nian, papél mídia públiku nian sai estratéjiku liután nu’udar ponte informasaun nian no instrumentu diplomátiku ida ne’ebé harii komprensaun no konfiansa entre nasaun sira.”
LPP RRI Denpasar iha área koordenasaun transmisaun nian ne’ebé kobre provínsia sira Bali no Nusa Tenggara Osidentál. Nu’udar plataforma mídia terrestre no dijitál multi-plataforma.
“Ami-nia kobertura terrestre maka 95%, ho estasaun transmisaun haat: Denpasar, RRI Mataran, RRI Singaraja no Estasaun Produsaun Bima.
Liuhusi enkontru ida-ne’e, hein atu fahe esperiénsia sira no prátika sira ne’ebé di’akliu no esplora oportunidade sira ba kolaborasaun ne’ebé fó benefísiu ba malu, tantu iha jestaun transmisaun públika, dezenvolvimentu konteúdu no utilizasaun plataforma dijitál sira hodi serbí públiku ho luan no inkluzivu liután.
“Ami hein katak vizita ida-ne’e sei fó benefísiu, hametin ami-nia amizade, no sai nu’udar inísiu ba kolaborasaun ida ne’ebé sustentável entre Sekretaria Estadu Komunikasaun Sosiál Timor-Leste nian no RRI LPP,” nia katak.
Hafoin troka ideia, Sekretáriu Estadu Komunikasaun Sosiál, Expedito Dias Ximenes, tara tais ba Xefe Rádiu Repúblika Indonézia, Denpasar, Institutu Rádiudifuzaun Institututu Públiku, Taufan Pamungkas Marhaendra Jaya. Nune’e parte RRI Denpasar fó mós lembransa Bali nian ba Hafoin troka ideia, Sekretáriu Estadu Komunikasaun Sosiál, Expedito Dias Ximenes. Hafoin ne’e, ekipa mídia Timor-Leste halo vizita ba sala redasaun RRI Denpasar, Bali, Repúblika Indonézia.
Diretora Ezekutiva Timor Post, Santina de Araújo, sente kontente ho media tour ne’e, tanba bele hetan referénsia balun husi Bali TV, Bali Post Online no Rádiu Repúblika Indonézia iha Denpasar.
“Media tour ne’e hanesan mós estudu komparativu hodi haree jestaun no prátika sira iha sala redasaun inklui ambiente serbisu sira liuliu prátika atividade jornalístika iha Bali.”
Diretora Timor Post ne’e konsidera media tour ne’e nu’udar oportunidade di’ak ba mídia iha Timor-Leste hodi esplora esperiénsia siea.
“Mídia Timor-Leste, hodi haree no rona rasik mídia iha Bali ninia esperiénsia, liuliu oinsá sira bele sobrevive iha era ida agora ne’e,” Diretora Timor Post, Santina de Araujo.
Notísia relevante: SEKOMS fasilita mídia Timor-Leste halo media tour iha Bali TV no Online
Jornalista: Evaristo Soares Martins
Editór: Florencio Miranda Ximenes
