BALI, 15 Janeiru 2026 (TATOLI) – Sekretáriu Estadu Komunikasaun Sosiál, Expedito Loro Dias Ximenes fasilita mídia Timor-Leste hamutuk 10 hala’o media tour iha Bali TV no Bali Post Online hodi hatene direita atividade jornalístika no troka ideia kona-ba tranformasaun dijitál iha tempu agora no ba futuru.
Ekipa Bali TV no Bali Post Online simu Sekretáriu Estadu Komunikasaun Sosiál, Expedito Loro Dias Ximenes no dirijente mídia sira ho di’ak no troka ideia sira hodi hasoru konverjénsia mídia iha transformasaun dijitalizasaun.
Media Tour ne’e kompostu husi RTTL, Ajénsia TATOLI, STL, Timor Post, Dili Post, SAP News, VIP TV, SMNews, Jornál INDEPENDENTE no GMN.
Sekretáriu Estadu Komunikasaun Sosiál, Expedito Loro Dias Ximenes, dehan ho dezenvolvimentu teknolojia ohin loron jornál tún ba beibeik, maibé jornál eziste nafatin iha sosiedade.
“kondisaun iha-ne’e hanesan mós iha Timor-Leste, maibé oinsá mak espíritu iha profisaun hanesan troka ideia tanba universal. Ami buka esperiénsia sira hodi hariku ami-nia espriénsia,” Sekretáriu Estadu Komunikasaun Sosiál, Expedito Loro Dias Ximenes, ko’alia asuntu ne’e liuhusi diskusaun iha edifísiu Bintang Radio dan Televisi, Bali, kinta ne’e.
Xefe Redasaun Bali TV, Made Sueca, kontente ho vizita Governu Timor-Leste nian iha área komunikasaun Sosiál hodi partilla hanoin sira iha área dijitalizasaun no konverjénsia mídia.
“Ami la perfeitu, ne’e mak ami-nia kondisaun hanesan mídia lokál ne’ebé hala’o funsaun hodi fó prioridade ba karáter kultura Bali nian, maibé ho perspetiva nasionál, tanba ne’e ita profisaun hanesan iha área mídia nian,” nia katak.
Nia dehan, komunidade mídia entre nasaun ho profisaun ho misaun prinsipál muda ema-nia mentalidade, liuliu joven sira, liuliu populasaun iha Bali.
“Iha Bali laiha rasizmu ba relijiaun, asuntu saida de’it, ami sempre habelar,” nia katak.
Nia dehan, uluk iha jornál maibé agora tenke adapta ba konverjénsia mídia tanba mundu dijitalizasaun obriga mídia hotu ba konverjénsia ne’e.
“Forsa ami-nian mak konverjénsia mídia, entaun jornalista bele hakerek ba jornál, hakerek ba online, hakerek ba TV, bele hasai foto no bele hato’o reportajen direta husi terrenu. Atu iha publisidade ka laiha publisidade mós Bali Post tenke kontinua nafatin, katak ho perspetiva nasionál hodi muda mentalidade oan sira-ne’ebé sai futuru nasaun nian,” nia hateten.
Xefe Redasaun Jornál Independente, Jorgino dos Santos, husu kona-ba independénsia editoriál Bali TV nian.
“Oinsá mak bele halo diferensa entre publikasaun iha jornál no oinline, nune’e bele halo leitór sira lee notísia sira, maske hatún iha iha onlne, maibe jornál hatún ikus, tanba autorimatikamente notísia hatún iha jornal leitór la lee ona tanba hatún ona iha online.”
Xefe Redasaun Bali TV, Made Sueca, esplika, polítika redasaun tenke koloka asuntu entre online no jornál labele hanesan, nune’e bele dada leitór sira-nia atensaun ba kualkér notísia.
“Ita tenke koloka asuntu ba online ho jornál labele hanesan, asuntu bele hanesan maibé anglu labele hanesan. Kona-ba independénsia editorial, ita bele akordu ho Governu iha publisidade, maibé krítiku ne’e tenke la’o nafatin, importante mak halo diferensa entre advetoriál ho notísia, no importante mak fó benefísiu ba sosiedade,” nia subliña.
Xefe Redasaun Bali Post Online, Diah Dewi Juniarti Mendala, sente kontente ho media tour ne’ebé organiza husi Sekretaria Estadu Komunikasaun Sosiál, hodi troka ideia iha área mídia nian.
“Ami kada loron diskute issue radasaun nian mak área sosiál no kultura sai nu’dar polítika redasaun Bali Post Online nian,” nia hateten.
Hafoin diskusaun, ekipa halo vizita ba sentru impresaun jornál, sala redasaun kompostu husi multimídia, editorial no estúdiu Bali TV no Bali Post Online.
Hafoin vizita fatin hirak-ne’e, Sekretáriu Estadu Komunikasaun Sosiál, Expedito Loro Dias Ximenes tara tais ba Xefe Redasaun Bali TV, Made Sueca, nu’udar lembransa.
Hafoin vizita ekipa Bintang Radio dan Televisi (BRTV), kontinua hala’o media tour ba Instituitu Radiodifuzaun Públika, Rádiu Repúblika Indonézia.
Notisia relevante: Aban, xefe redasaun na’in-10 sei halo estudu komparativu iha Indonézia
Jornalista: Evaristo Soares Martins
Editór: Florencio Miranda Ximenes
