OEKUSI, 15 Janeiru 2026 (TATOLI) – Ekipa tékniku husi Diresaun Rejionál Infraestrutura (DRI), hala’o fiskalizasaun ba konstrusaun ponte Oébaha ne’ebé lokaliza iha suku Bobometo sub-rejiaun Oéssilo, sei konklui iha fulan-fevereiru 2026, hodi fasilita movimentu ema no transporte bele ultrapasa iha tempu udan.
Diretór Diresaun Rejionál Infraestrutura Oekusi, Remígio Nuno Sila, relata, progresu fiziku daudaun ne’e atinje ona 68,57%, empreza sei kompletu de’it aterru no nahe simentu inklui kontinua finaliza morru protesaun.
“Progresu agora di’ak iha mudansa 68,57%, tanba item serbisu falta aterru leten de’it ho nahe, morru protesaun ba parte oeste nian mak seidauk finaliza maibé sorin-sorin kuaze hotu ona. Ita hein katak fulan oin, empreza sei finaliza tuir rezutadu fiskalizasaun ne’ebé DRI halo ona iha terrenu, katak presiza aselera tanba agora tempu udan, nune’e bele apoia ita-nia movimentu públiku bele asesu,” nia informa jornalista sira iha Oekusi, ohin.
Notísia relevante:Rogério Lobato orienta DRI prepara BoQ hodi konstrui ponte iha Oébaha
Nia hateten, bazeia observasaun hodi Diresaun Rejionál Infraestrutura katak, maske daudaun ne’e tama ona tempu udan, maibé bainhira udan akontese, laiha ameasa hodi fó impaktu ba konstrusaun, tanba serbisu fíziku iha fondasi maioria konklui hein de’it atu nahe simenti.
Notísia relevante:Progresu serbisu ponte Oébaha atinje ona 60%
Entretantu, ponte Oébaha lokaliza iha bairru Paut aldeia Oébaha suku Bobometo sub-rejiaun Oésilo, nu’udar dalan alternativa atu liga bá sub-rejiaun Oésilo, Pássabe inklui Nítibe.
Oébaha ezekuta husi konstrusaun ponte kompañia lokál Bobometo Unip, Lda ho valór kontratu $841,871.06, Autoridade RAEOA aloka husi Orsamentu Jerál Estadu (OJE) 2025
Jornalista: Abílio Elo Nini
Editór: Rafael Ximenes de A. Belo
