OEKUSI, 15 Setembru 2025 (TATOLI) – Progresu serbisu ba projetu ponte Bitopa daudaun ne’e atinje ona 60%, no tuir planu kompañia tenke finaliza iha fulan-Novembru 2025 ne’e.
“Ponte Oébaha, la’o nafatin, agora nia progresu serbisu atinje ona 60%. Entaun, nia prosesu pagamentu mós la’o daudaun ona, tanba ita-nia hakarak, fulan-Novembru, tenke entrega ona ba Autoridade,” Xefe Departementu Ponte Estrada no Kontrolu Seias, Cornelio Seran, informa ba Ajénsia TATOLI, iha Oekusi, ohin.
Notísia relevante:Komunidade Oébaha husu Rogério Lobato kumpre promesa harii ponte iha Paut
Nia esplika katak, husi pursentu ne’e, serbisu fíziku, hanesan gabiaun (bronjong), monta arrampu sira kompletu ona, hein de’it fui simentu, tanba medida arrampu sira-ne’e, nia mahar de’it milimetru-4,3, ho nia aas metru 4,40 sentimetru, ne’ebé karreta bele liu ba mai tuir arrampu iha okos.
“Entaun ita-nia alvu atu konklui projetu ne’e, antes udan monu rai, kompaña tenke finaliza, tanba mota Paut ne’e, kada tinan sempre difikulta, movimentu transporte no ema husi Pássabe, Oésilo inklui Nítibe sorin atu asesu mai iha Pante Makasar,” nia hateten.
Jestór sub-rejiaun Oésilo, Benedito Ulan, sujere presiza aselera, tanba ponte ne’e alternativa atu fasilita transporte no komunidade sira iha tempu udan.
“Ha’u-nia esperansa ponte ne’e tenke la’o, atu fasilita movimentu transporte no komunidade sira liuliu iha tempu udan, tanba ponte ne’e sei liga ba ponte Bitopa, fasilita komunidade suku tolu iha Oésilo, Nítibe sorin hanesan suku Ban-Afi, Lela-Ufe, no mós suku rua iha sub-rejiaun Pássabe, tanba ponte ne’e alternativa atu asesu tam aba Pante Makasar Oekusi vila,” nia orgullu
Notísia relevante:Empreza Bobometo ladauk konstrui Ponte Oébaha
Entretantu, ponte Oébaha lokaliza iha bairru Paut aldeia Oébaha suku Bobometo sub-rejiaun Oésilo, nu’udar dalan alternativa atu liga bá sub-rejiaun Oésilo, Pássabe inklui Nítibe.
Kontrusaun ponte Oébaha ezekuta husi kompañia lokál Bobometo Unip, Lda ho valór kontratu $841,871.06, Autoridade RAEOA aloka husi Orsamentu Jerál Estadu (OJE) 2025.
Jornalista: Abílio Elo Nini
Editór: Rafael Ximenes de A. Belo
