OEKUSI, 15 Janeiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejionál Agrikultura ho Departamentu Floresta, tersa ne’e, lansa programa kuda ai-oan ba tinan-2026 ho espesie tolu hamutuk hun 105 iha suku Kutete sub-rejiaun Pante Makasar.
Diretór Diresaun Rejionál Agrikultura, José Oqui, informa, programa kuda ai-oan ne’e, nu’udar polítika Diresaun Rejionál Agrikultura, ne’ebé tau prioridade iha tinan ne’e, tanba ne’e iha sesaun abertura ne’e, lansa uluk ba ai-oan 105 ne’ebé kuda espesie tolu hanesan ai-gaharu 50, ai-kafé 50 ho nuu hibrida lima (5).
“Ai-gaharu ne’e, ai ida-ne’ebé primeira-ves ita kuda iha Oekusi iha tinan ida-ne’e. Ai gaharu hanesan ai ida-ne’ebé nia folin bootliu ai sira hotu. Entaun tinan ne’e, ita abertura dahuluk kuda Kutete tanba koñesidu mós hanesan rai-malirin, maibé la’ós gaharu de’it ita mós kompleta ho kafé no nuu hibrida, faze tuir ita mós identifika fatin balun atu kontinua kuda tan,” José informa iha ámbitu abertura kuda ai-oan iha Kutete, ohin.
Notísia relevante:Bobonaro prepara ai-oan rihun 10 kuda iha área protezida
Ezekutivu ne’e subliña, tinan ne’e, Diresaun Rejionál Agrikultura, tau prioridade ba ai garahu, tan ne’e ohin lori de’it 50, atu oferese ba agrikultór sira hanesan meiu ida atu sosializa ba grupu agrikultór sira, maibé ba oin kuandu nia progresu iha mudansa, diresaun sei distribui tan ho volume boot.
“Ita bele dehan, ai ne’ebé mak nia valór bootliu iha mundu mak ai gaharu, kuandu ita kompara ho ai-kameli, ai gararu ne’e tinan 10 to’o tinan-15, ita bele kolleta ona hodi fa’an ba merkadu, kompara ho ai-kameli bele tinan-50 mak foin kolleta,” nia afirma.
Notísia relevante:Governu investe iha plantasaun ai-kameli iha rai ektare 225
Gervasio Quebo, nu’udar Xefe Aldeia Kutete, agradese ba Autoridade RAEOA liu-liu serbisu agrikultura rejionál, tanba tinan ne’e, hili suku Kutete ba abertura kuda ai-oan.
“Hakarak informa de’it katak, ami hanesan suku foun tanba foin eleitu iha tinan kotuk, maibé agradese boot tanba Governu hahú tau matan, tinan kotuk programa PNDS tama ami-nia suku hadi’a dalan no postu saúde, ohin kuda ai-oan, tan ne’e ha’u reprezenta komunidade Kutete hato’o agradese ba Autoridade nia apoia. Ami espera tempu seluk bele apoia tan, tanba iha Kutete ami kria grupu barak, hanesan grupu haki’ak ikan, kuda vanili no grupu kuda kafé,” nia orgullu.
Jornalista: Abílio Elo Nini
Editór: Rafael Ximenes de A. Belo
