DILI, 15 Janeiru 2026 (TATOLI) – Iha tinan kotuk, traballadór timoroan iha Austrália no Koreia Súl transfere millaun $15-resin mai Timor-Leste (TL), informa Diretór Nasionál Empregu Estranjeiru iha Sekretaria Estadu Formasaun Profisionál no Empregu (SEFOPE), João Correia Pereira.
Dirijente ne’e dehan remesa ne’e mai husi traballadór ne’ebé bá serbisu iha Austrália hamutuk 4.840 no Koreia Súl 791.
“Iha 2025, ita-nia traballadór serbisu iha Koreia Súl no Austrália nia remesa hamutuk $15.275.013,64, maibé ita konta husi 2018 to’o 2025 totál remesa ne’ebé iha hamutuk $101.483.112,54”, João Correia Pereira dehan ba Tatoli iha City 8 Manleuana, Dili.
Nia salienta katak, iha tinan ne’e, SEFOPE nafatin prepara traballadór timoroan ne’ebé atu bá serbisu iha Austrália no Koreia Súl, maibé kuantidade hira mak atu bá depende ba pedidu husi empregadór sira.
Aleinde ne’e, iha tinan 2025, Governu mós haruka traballadór timoroan bá serbisu iha Japaun hamutuk 64, husi númeru ne’e tolu fila ona mai Timor-Leste, restu sei iha Japaun.
Lembra katak Banku Sentrál Timor-Leste (BCTL, sigla portugés) fó sai dadus traballadór timoroan sira iha Koreia Súl, Austrália, Irlánda, Reinu Unidu, no seluk tan ne’ebé haruka osan mai Timor-Leste, iha tinan 2024, hamutuk millaun $244,8, ne’ebé reprezenta 14,5% husi Produtu Internu Brutu (PIB).
Remesa boot liu mak mai husi Reinu Unidu ho valór millaun $100, Austrália millaun $61, Koreia Súl millaun $44,8 no millaun $39 husi nasaun seluk.
Notísia relevante: Traballadór timoroan iha diáspora kontribui remesa millaun $244,8 durante tinan 2024
Jornalista: Arminda Fonseca
Editora: Maria Auxiliadora
