DILI, 16 Janeiru 2026 (TATOLI)–Universidade Nasionál Timor Lorosa’e (UNTL) liuhusi nia eis-Reitór Armindo Maia, husu ba Polísia Nasionál Timor-Leste (PNTL) atu hadi’a maneira atuasaun, bainhira kumpre mandadu tribunál.
Nia dehan komunidade UNTL, hanesan institutu akadémiku ida-ne’ebe harii liuhusi eis-UNTIM no eis-Politékniku Dili, iha ona esperiénsia moruk durante tinan sanulu resin, hasoru kilat-musan no gás lakrimozéneu iha tempu okupasaun, bainhira TNI no POLRI atu asalta no viola autonomia kampus.
“Haree filafali ba hahalok aat sira iha leten, no haree ba tratamentu degradante kapturasaun reitór no dirijente UNTL sira iha kampus laran husi autoridade seguransa sira, difísil tebes ba ami atu haree diferensa entre forsa sira-ne’e husi sira-nia hahalok,” nia dehan liuhusi konferénsia imprensa, iha salaun vídeo konferénsia UNTL, Sesta ne’e.
Notísia relevante: Prosesu la’o, PTR labele fó komentáriu kona-ba detensaun Reitór UNTL
Tan ne’e, nia parte lamenta no kondena hahalok degradante no violentu autoridade seguransa sira hasoru reitór no dirijente UNTL sira seluk iha kampus laran no fatin seluk.
“UNTL apela ba autoridade seguransa atu respeita kampus no komunidade akadémika sira iha situasaun hotu-hotu, tuir estatutu legál nu’udár instituisaun akadémika estatál. Tan ne’e, ami husu ba Estadu atu toma medida ba hahalok aat sira-ne’e, hodi evita akontese tan iha tempu tuirmai,” nia dehan.
Iha fatin hanesan, eis-Dekanu Fakuldade Politéknika Hera, Inácio Freitas Morreira haktuir PNTL presiza halo aprosimasaun ho reitór no dirijente sira molok halo asaun, la’ós tau kedan alzema iha kampus.
“Ita haree kazu pur kazu. Rstudante sira-nia kazu ne’ebé ohin hateten kapturasaun ne’e kazu seluk, ne’ebé ha’u hanoin ita bele tuur hamutuk ko’alia para rezolve, maibé konferénsia imprensa ohin ha’u bele dehan ita-nia autoridade seguransa mai halo buska no apreensaun, kapturasaun no to’o detensaun, ida-ne’e ami presiza ko’alia ba públiku para bele hadi’ak,” Inácio tenik.
Tuir nia, bainhira ema ida iha kazu, tau kedan alzema ida-ne’e sente triste. Nune’e husu ba Estadu atu haree atu sira hanesan ne’e, atu bele hadi’ak.
Nune’e mós, Reitór Eleitu, Juviano António da Costa esplika UNTL hanesan universidade estatál, prodús ona matenek barak, tan ne’e la konkorda ho atuasaun PNTL ne’ebe tau kedan alzema ba reitór no dirijente sira, tanba bele estraga imajen UNTL nian.
“Polísia mai sein iha mandadu, no situasaun ne’ebé akontese bele mai bolu atu ba hatán, maibé saida mak akontese mai halo kapturasaun ho obrigatória. Imajen ida ladi’ak ba profesór sira,” nia triste.
Tuir nia katak sira la’ós kontra mandadu tribunál, más divia kapturasaun referida la devia ho obrigatóriu no ho aprosimasaun umanidade ne’ebé adekuada.
“La duvia mai tau alzema, tanba sei iha maneira seluk ne’ebe ita halo, atu ema hotu bele kontribui ba iha justisa,” nia hakotu.
Jornalista: Osória Marques
Editór: Xisto Freitas da Piedade
