DILI, 16 Janeiru 2026 (TATOLI)-Prezidente Tribunál Rekursu (PTR), Afonso Carmona, la fó komentáriu kona-ba detensaun reitór, vise-reitór no kargu xefia na’in-haat husi Universidade Nasionál Timor-Leste (UNTL), tanba prosesu la’o hela iha tribunál.
“Liga ho prosesu, ha’u lakohi fó komentáriu, tanba lei dehan labele [halo] komentáriu buat ne’ebé la’o hela, inklui juis ne’ebé ka’er [prosesu], só advogadu karik, tanba nia defende nia kliente”, Afonso Carmona hateten iha Parlamentu Nasionál, ohin.
Tanba ne’e, atu labele viola regra, bainhira iha ona desizaun ruma mak foin bele ko’alia.
Kestiona kona-ba atuasaun mandadu ne’e bazei ba regra, Prezidente Tribunál Rekursu hateten nia parte la konklui ida-ne’e. “Notísia dehan polísia ka’er, tau aljema iha liman hodi lori bá, ema hothotu hatene”, nia argumenta.
Lembra katak, iha 13 Janeiru, Polísia Nasionál Timor-Leste (PNTL), liuhusi Diresaun Servisu Investigasaun Kriminál (DSIKN) ezekuta mandadu Tribunál Judisiál Primeira Instánsia Dili ho NUC 086/25-PNSIK hodi halo buska, apreensaun, no detensaun ba Reitór UNTL, João Martins no Vise-Reitór ba Asuntu Administrasaun Finansa no Administradór-Jerál, inklui kargu xefia na’in-haat seluk, tanba iha indísiu krime falsifikasan dokumentu no anotasaun téknika.
Mezmu nune’e, Ministru Ensinu Superiór, Siénsia no Kultura (MESSK), José Honorio da Costa Pereira Jerónimo, lamenta ho detensaun ne’e no karik sira halo aktu ruma ladún di’ak iha UNTL, tuir loloos tribunál fó karta ba reitór sira, nune’e bele ba presta deklarasaun.
Kona-ba problema ne’e, Primeiru-Ministru, Kay Rala Xanana Gusmão, mós husu MESSK atu haree ho sériu, nune’e situasaun sira ne’e labele akontese beibeik iha Timor-Leste.
Notísia relevante: https://tatoli.tl/2026/01/14/ministru-ensinu-superior-lamenta-ho-detensaun-reitor-untl/
Jornalista: Nelson de Sousa
Editora: Maria Auxiliadora
