DILI, 16 Janeiru 2026 (TATOLI)—Embaixada Xina iha Timor-Leste organiza enkontru tripartida entre Asosiasaun Emprezaria Xineza Timor-Leste no Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa.
Iha biban ne’e, Embaixadora Xina iha Timor-Leste Wang Wenli, husu ba Komandu Jerál PNTL atu garante seguransa ba komunidade xineza iha Timor-Leste.
“Enkontru tripartida ida-ne’e hanesan ba dala-tolu, ami hala’o enkontru ida-ne’e hanesan hametin liután parte hothotu, ami konsidera katak ita-nia seguransa no estabilidade sosiál importante tebes ba empreza no komunidade xineza ne’ebé halo negósiu iha ne’e,” Embaixadora Xina hato’o iha Embaixada Xina, Farol, Sesta ne’e.
Embaixada Xina rekomenda ba Autoridade Seguransa atubele foku ba projetu boot, ne’ebé bele hadi’a povu nia moris no hala’o komunikasaun ho Polísia Komunitária hodi fó seguransa di’ak ba komunidade.
“Ita mós rekomenda katak PNTL bele fó formasaun ba traballadór sira ne’ebé serbisu iha Timor-Leste,” nia akresenta.
Embaixadora Wang hateten, Xina prontu atu harii Postu Polísia iha Merkadu Maliana.
Hato’o mós katak, membru sira husi empreza no asosiasaun xineza sira iha Timor-Leste mós konkorda katak sei mantein komunikasaun di’ak ho PNTL.
“Sira mós sente seguru hodi moris iha Timor-Leste. Ein jerál organizasaun no asosiasaun xineza iha Timor-Leste konsidera situasaun iha Timor la’o di’ak,” Diplomata ne’e katak.
Notísia relevante : Komunidade xineza selebra tinan foun hodi kumprimenta no solidariza malu
Embaixadora Wang husu ba komunidade xineza ne’ebé hela iha Timor-Leste, tenke tuir lei no orden.
“Ami mós rekomenda no fó hanoin ba ami-nia komunidade xineza, bainhira hala’o negósiu iha Timor-Leste, tenke tuir lei ne’ebé iha, respeitu lisan no kultura Timor-Leste no integra komunidade sira-nia an iha komunidade Timor-Leste hodi fó apoiu ba moris Timor-Leste,” Embaixadora hatutan.
Iha fatin hanesan, Komandante Jerál PNTL Komisáriu Jerál Polísia Henrique da Costa, hateten, situasaun ein jerál iha Timor-Leste la’o di’ak no povu hotu hetan protejidu.
Nia dehan, enkontru ne’e nu’udar inisiativa husi Komandu Jerál PNTL rasik, ne’ebé antes ne’e realiza ona.
“Komunidade xineza iha Timor-Leste ne’e barak no sira mai investe iha Timor-Leste, nune’e parte seguransa tenke garante katak sira-nia fatin seguru hodi investe no sira-nia projetu bele la’o ho seguru tanba ne’e ita halo enkontru ho sira, ita hateten katak prezensa ita-boot sira-nia iha Timor-Leste bele fó kontribuisaun boot ba Timor-Leste no kria mós kampu traballu ba timoroan sira,” nia katak.
Autoridade Seguransa sei garante seguransa la’ós de’it ba timoroan maibé ba xineza sira nune’e bele investe iha Timor-Leste.
“Ita presiza kria komunikasaun di’ak atu nune’e hafasil sira hodi komunika mai Polísia. Buat ne’ebé ita fahe mak númeru emerjénsia no númeru Polísia atu nune’e bainhira iha buat ruma bele kontaktu lalais hodi bele responde,” nia tenik.
Komandante Jerál PNTL dehan, sei kria plataforma ida nune’e iha situasaun saida de’it Polísia bele fahe informasaun ba komunidade xineza.
“Sira husu atu Polísia bele halo movimentu barak liután ba iha sira-nia loja sira iha tempu kalan tanba komesa loja barak mós ema naok iha tempu kalan, hanesan iha Maliana,” nia hato’o.
Nune’e, PNTL sei intensifika atividade patrollamentu iha tempu kalan no sei kompleta liután CCTV.
“Husu ba xineza ne’ebé mak halo halo negósiu iha Timor-Leste tenke monta CCTV iha sira-nia loja atu nune’e kuandu problema mosu, sira bele serbisu hamutuk ho Polísia nune’e fasil rekolla gravasaun sira hodi halo analize, informasaun Polísia hodi haree hodi bele buka tuir suspeitu sira,” Komandante fó hanoin.
Jornalista : Natalino Costa
Editora : Julia Chatarina
