VIKEKE, 16 Janeiru 2026 (TATOLI)—Xefe Suku Afaloikai, Postu Administrativu Uatulari, Munisípiu Vikeke, Cesário N. Pires informa, daudaun ne’e, estrada liga bá Aldeia Ossokaiua parte foho nian ho kondisaun grave hodi difikulta transporte sira, nune’e autoridade no komunidade hamutuk halo normalizasaun ho distánsia kilómetru tolu hodi fasilita movimentu transporte.
“Ohin loron ami-nia estrada sira-ne’ebé liga bá aldeia sira iha foho hanesan Ossokaiua tempu udan ne’e difikulta tebes transporte sira tanba tahu no fatuk boot barak. Karreta atu lori materiál konstrusaun ruma ba área ne’ebá difisil. Entaun, ami autoridade hamutuk ho ita-nia populasaun iha foho ho inisiativa ateru dalan ku’ak sira atu fasilita transporte sira bele asesu,” Cesário ba TATOLI,I.P. iha Postu Vikeke Vila, Sesta ne’e.
Notísia relevante: https://tatoli.tl/2025/09/19/kondisaun-estrada-liga-ba-ossokaiua-aat-difikuta-komunidade-transporta-produtu-lokal-ba-merkdu/
Autoridade lokál ne’e dehan maski halo normalizasaun ba dalan sira-ne’e, maibé iha tempu udan aat fali halo karreta sira labele asesu.
“Durante ne’e, dalan mak difikulta tebes ami-nia populasaun ne’ebé hakarak lori sai produtu lokál sira bá merkadu, moras emerjénsia ruma iha-ne’ebá ambulánsia atu transporta lalais mós labele. Ami sente izoladu tebes,” nia hato’o.
Nia husu Governu fó-atensaun ba infraestrutura sira iha área rurál liuliu estrada no bee-moos atu populasaun sente dezenvolvimentu tanba populasaun sira terus tinan barak ona, maibé seidauk iha mudansa ba dezenvolvimentu iha área remota sira.
Tuir dadus, populasaun Aldeia Ossokaiua uma-kain 30-resin, ho totál abitante hamutuk 100-resin ne’ebé daudaun hela iha Aldeia Ossokaiua foho.
Jornalista: Vitorino Lopes da Costa
Editór: Xisto Freitas da Piedade
