VIKEKE, 16 Janeiru 2026 (TATOLI)—Institutu Jestaun Ekipamentu Apoia Dezenvolvimentu Infraestutura, Institutu Públiku (IGEAD,I.P.) destaka ona ekipamentu pezadu iha mota Bikarin, Suku Bahalaraua’in, Postu Administrativu Vikeke Vila, Munisípiu Vikeke, hodi normaliza mota Bikarin ne’ebé fó ameasa ba populasaun nia hela fatin.
Tuir Xefe Suku Bibileo, Moises A. D. C. Pinto haktuir foin lalais iha fulan-Dezembru 2025, mota Bikarin sai ameasa ba komunidade husi Suku Bahalaraua’in no Suku Bibileo tanba mota laiha barajen hodi satan mota bainhira mota tun iha tempu udan ne’ebé sai preokupasaun ba populasaun parte suku rua.
Notísia relevante: https://tatoli.tl/2025/12/29/autoridade-bibileo-husu-igeadi-normaliza-mota-bikarin/
“Preokupasaun mota ne’e ha’u aprezenta ba parte relevante sira hodi halo normalizasaun mota ba tasi. Husi ami preokupasaun sira-ne’e iha Segunda foin lalais IGEADI destaka ona ekipamentu pezadu mai iha mota Bikarin hodi normaliza mota atu mota labele fó risku ba ami,” Xefe Suku Bibileo dehan ba TATOLI iha nia knaar fatin, Sesta ne’e.
Autoridade lokál ne’e relata katak daudaun ne’e destaka ona ekipamentu ida (eskavatór) husi IGEADI iha mota Bikarin laran hodi suru rai-henek sira-ne’e tau iha mota ninin hodi satan bee, atu labele fó risku ba populasaun.
Jornalista: Vitorino Lopes da Costa
Editór: Xisto Freitas da Piedade
