Laiha ponte, komunidade Sibuni no Molop hasoru risku boot iha tempu udan
BOBONARU, 16 Janeiru 2026 (TATOLI)-Komunidade husi suku Sibuni no Molop, postu administrativu Bobonaru, munisípiu Bobonaru, solisita ba Governu atu konstrui ponte iha mota Laku no Pazól, tanba tempu udan, volume bee iha mota rua ne’e fó ameasa beibeik ba sira-nia vida.
Rezidente Sibuni, Justino de Jesus, afirma katak durante tinan barak nia laran sira hetan difikuldade iha períodu tempu udan, liuliu atu atende nesesidade bázika no asesu bá servisu saúde nia.
“Ami husu ba Governu atu tau-matan mai ami povu suku rua ne’e, halo netik ponte ida para ami bele liu bá-mai, tanba tempu udan, tinan-tinan ami susar tebes atu bá sosa ai-han no ami nia presiza seluk tan. Dalaruma ami obriga bá, maibé ami-nia vida mós ameasada. Balun fila mai motór mós hulan de’it, udan kareta tama mai la diak”, nia hateten ba Tatoli iha merkadu Maliana, ohin.
Alberto Soares, abitante husi suku Molop, dehan mota Laku no Pazól mak dalan úniku liga komunidade suku rua ne’e.
Maibé, tuir nia, komunidade husi aldeia Omelai no Anapál mós vulneravel liu, tanba tenke atravesa mota rua simultaneamente, Pazól no Laku, hodi asesu bá postu administrativu Bobonaru no kapitál munisípiu.
“Mota Pazól ne’e ida de’it más luan. Mota Laku ne’e mós ida de’it mak fahe ba rua kedas. Dalaruma ami tama to’o klaran tiha mak bee-boot, pasiénsia ami hein iha rai-maran ida klaran ne’e to’o udan para, bee-menus mak foin liu. Ami suku rua tinan barak ona hasoru problema ida-ne’e, más na’i-ulun sira seidauk tau-matan”, nia lamenta.
Tanba ne’e, sira hein katak Governu sentrál no lokál sei vizita área ne’e hodi avalia situasaun no foti asaun lalais, partikularmente konstrui ponte temporáriu nu’udar solusaun urjente ba seguransa no moris di’ak povu nia.
Lembra katak, iha 2022, mota Laku hamate ona ema na’in-rua (oan no aman) hafoin viajen husi postu Bobonaru iha tempu udan.
Aleinde ne’e, entre 2015 no 2016 mós akontese mota lori ema na’in-tolu no la konsege salva sira-nia vida.
Notísia relevante: Populasaun Soilesu labele asesu bá instalasaun saúde no eskola iha tempu udan
Jornalista: Sergio da Cruz
Editora: Maria Auxiliadora
