BOBONARU, 10 Dezembru 2025 (TATOLI) – Kada-tinan bainhira tama tempu udan komunidade iha Aibou no Sibilau, iha subaldeia Soilesu no Ai-Aras, suku Soilesu, postu administrativu Bobonaru, labele asesu bá instalasaun saúde no estudante sira mós difísil atu partisipa iha ensinu-aprendizajen, tanba laiha dalan alternativu atu hakat mota.
Jeografikamente, subaldeia rua ne’e lokaliza iha área izolada ho nia totál uma-kain 61 no iha membru família 700-resin, ne’ebé baliza ho suku Obulo, postu administrativu Atsabe, munisípiu Ermera.
Xefe Suku Soilesu, Marito Víctor, preokupa tanba problema ne’e bele fó ameasa ba komunidade no estudante sira-nia vida.
Notísia Relevante:Komunidade Suku Soilesu Preokupa ho Estrada Ligasaun Suku ba Munisípiu Bobonaro
“Estrada ne’e kada tinan kuandu tama fulan-Maiu ami organiza komunidade halo limpeza jerál mak foin bele liu, más agora udan ne’e araska. Depois ita haree ba ponte ne’e liga bá postu rua, Atsabe ho Bobonaru. Governu presiza tau prioridade tanba komunidade iha ne’e maioria agrikultór, kuandu udan, difikulta atu lori produtu lokál bá merkadu, tanba ponte laiha”, nia afirma ba jornalista sira, ohin.
Nomós sai problema ba inan isin-rua sira, tanba dalaruma tau de’it iha kadeira no hulan de’it tanba mota maka ambulánsia susar atu ultrapasa. “Dalaruma ema moras, sira hein to’o mota tun tiha mak foin hulan ba”, dehan.
Marito Víctor haktuir problema kona-ba ponte no estrada ne’e líder komunitáriu sira iha mandatu anteriór no agora sempre tau prioridade no hato’o beibeik ba Autoridade Munisípiu Bobonaru atu rezolve ho orsamentu Planu Dezenvolvimentu Integradu Munisipál (PDIM), maibé to’o agora laiha rezultadu.
“Estrada ne’e ita labele rezolve liu husi programa tanba orsamentu ne’e ki’ik liu, depois ponte ne’e boot entaun presiza rezolve ho orsamentu grande projetu hodi bele fasilita komunidade halo movimentu”, salienta.
Rezidente aldeia Ai-Aras, Alípio Soares Barreto, rekomenda ba Governu atu tau-matan ba problema ne’e, tanba tinan 20-resin ona komunidade sira iha área ne’e seidauk asesu bá infaestrutura bázika hanesan estrada, eletrisidade, ponte, bee-moos.
Alípio relata katak, tinan hirak liubá, komunidade harii ona ponte alternativu ida ho uza ai-riin eletrisidade nian, maibé obra ne’e mós bele fó ameasa ba ema nia vida tanba ladún seguru. “Ami-nia estrada ho ponte ne’e agora tempu udan labarik sira labele mai, tanba mota boot. Komunidade sira hola sasán ruma husi Maliana mai to’o iha foho leten ne’e para lalin de’it”, nia realsa.
Kona-ba problema eletrisidade foin lalais ne’e ekipa téknika husi Eletrisidade Timor-Leste, Empreza Públika ho kompañia sira halo ona site visited iha terrenu no tuir planu, sei implementa iha tempu badak.
Tuir dadus 2025, suku Soilesu iha totál populasaun 1.671 no iha uma-kai 379, mai husi aldeia Ai-Aras no Soilesu.
Notísia relevante: PAM Alexandrino rona preokupasaun komunidade postu Bobonaro
Jornalista: Sergio da Cruz
Editora: Maria Auxiliadora
