DILI, 16 Janeiru 2026 (TATOLI) – Prezidente Parlamentu Nasionál, Maria Fernanda Lay, akompaña husi Prezidente Komisaun sira no Reprezentante Grupu Amizade Parlamentár Timor-Leste ba Japaun, simu audiénsia husi Xefe Delegasaun Parlamentár Japaun, Ishida Masahiro, ho nia komitiva sira.
Objetivu sorumutu ne’e atu hametin lasu amizade entre nasaun rua, liuliu nivel parlamentár nian.
Durante audiénsia, parte rua diskute kona-ba investimentu projetu ne’ebé Governu nipóniku realiza ona iha Timor-Leste, iha área infraestrutura, saúde no edukasaun.
Aborda mós investimentu iha setór privadu nian kona-ba fortalesimentu lei no implementasaun, haforsa serbisu fiskalizasaun ba programa Governu relasiona ho doasaun ba programa dezenvolvimentu Timor-Leste husi país amigu sira.
Fernanda Lay hato’o sentidu gratidaun ba membru parlamentár japonés no povu Japaun sira-nia apoiu mai Timor-Leste hahú husi tempu difísil to’o iha era indepedénsia, inklui mós apoiu Parlamentu Japaun nian mai Timor-Leste hodi sai membru efetivu ASEAN nian.
Prezidente Parlamentu dezeja katak liuhusi kooperasaun sira ne’e kontinua hametin amizade no fó benefísia pozitiva ba iha rai rua ne’e.
Sorumutu ne’e akompaña husi Embaxadór Japaun iha Timor-Leste, Yomamoto Yashushi.
Notísia relevante: Japaun hametin kooperasaun ho TL iha área infraestrutura-agrikultura-turizmu
Jornalista: Nelson de Sousa
Editora: Maria Auxiliadora
