DILI, 16 Janeiru 2026 (TATOLI)-Prezidente Tribunál Rekursu (PTR), Afonso Carmona, rekomenda ba Komisaun F ne’ebé Trata Asuntu Saúde, Igualdade Jéneru, no Inkluzaun Sosiál iha Parlamentu Nasionál atu halo diskusaun nakloke ho parte hothotu ba projetu Lei númeru 9/VI(2a)-Regulamentu Prosesu Adosaun, hodi bele prodús lejislasaun ida ba duni interese populasaun, liuliu ba labarik sira.
“Atu lei ne’e aplika ba ema hotu mak tenke loke oportunidade ba parte hotu hodi fó opiniaun, mellora lei ne’e ba interese populasaun nian, liuliu labarik sira-nia’’, Afonso Carmona hato’o iha ámbitu audiénsia públika ba projetu lei ne’e iha Parlamentu, ohin.
Nia salienta katak ho adosaun ne’e la’ós buat foun no agora presiza lei hodi fasilita, tanba interese labarik sira-nia importante.
“Lei ne’e mós atu fasilita autoridade tribunál nia desizaun no fasilita interesadu sira. Importante ninia prosedimentu sidadaun hotu hatene”, nia realsa.
Parte tribunál nia introdutória prévia ba projetu lei ne’e no durante audiénsia hato’o ba komisaun atu konsidera iha diskusaun espesialidade atu haree, liuliu parte preámbulu, no presiza halo esplikasaun ba termu sira kle’an kona-ba adosaun, adotadu, define idade adosaun no presiza haree detallu kona-ba kritéria sira no haree termu jurídiku.
Fó mós hanoin kona-ba autoridade kompetente ho adosaun internasionál ne’ebé liga ho kompeténsia Governu nian.
Notísia relevante: Konfisaun relijioza konsidera projetu Lei Adosaun atu proteje labarik sira
Jornalista: Nelson de Sousa
Editora: Maria Auxiliadora
