Ramos-Horta destaka importánsia Feira Livru Doulos Hope ba labarik sira
DILI, 16 Janeiru 2026 (TATOLI) – Prezidente Repúblika, José Ramos-Horta, halo abertura ba feira livru ne’ebé organiza husi Ró-biblioteka internasionál Doulos Hope, entre loron 16 no 28 Janeiru 2026, iha Portu Dili, ohin.
Abertura ne’e partisipa mós husi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Flancisco Kalbuadi Lay.
Prezidente Repúblika hateten feira livru ne’e importante tanba iha livru barak ne’ebé ko’alia konteúdu oioin ne’ebé di’ak ba vizitante sira atu lee, liuliu ba labarik sira.
“Feira livru ne’e di’ak tebes tanba nu’udar sentru biblioteka ida ne’ebé fasilita livru oioin ba labarik sira no ema boot bele estuda no lee. Ha’u espera labarik barak bele mai vizita durante semana rua-resin iha ne’e”, Ramos-Horta realsa iha Portu Dili.
Xefe Estadu ne’e mós espera katak, ho prezensa ró ne’e, manorin-na’in sira husi eskola oioin bele lori labarik sira vizita no haree livru sira ne’e hodi motiva sira atu lee, inkuli mós ema boot sira.
Iha abertura feira livru ne’e, Prezidente Repúblika hato’o mós katak Timor-Leste nu’udar país demokrátiku ne’ebé livru husi konflitu seluk tan. “Ha’u sempre esplika ba mundu katak Timor-Leste laiha violénsia polítika, violasaun ka diskrimisaun rasiál étnika no relijiaun, livre ba mídia halo kobertura no seluk tan. Ha’u nu’udar Prezidente orgullu ba ida-ne’e”, afirma.
Nia parte mós husu ba pasajeiru sira iha ró ne’e katak durante estadia iha Timor-Leste bele desfruta atividade saida de’it mak sira halo iha semana rua-resin ne’e.
Kapitaun Ró Doulos Hope, Gilbert Garcia, agradese Governu Timor-Leste tanba bele autoriza sira hodi atraka iha Portu Dili no fasilita sira halo atividade sira. “Ida-ne’e onra no priviléjiu ida simu ami iha ró ida-ne’e”, dehan.
Lembra katak Doulos Hope iha esperiénsia dahuluk mai Timor-Leste iha tinan 2008 no atraka durante semana ida, ne’ebé simu vizitante liu rihun 33.
“Iha tempu ne’ebá, ami-nia operasaun sira feira livru nian durante loron neen, maibé tuir relatóriu barak husi sira mak labarik lubun boot ida. Tinan 17 liu ona no ha’u bele imajina katak labarik sira-ne’e agora sai hanesan líder klase mundiál ne’ebé sei mai, dudu nasaun ne’e ba ekonomia ne’ebé di’ak liu”, realsa.
Nia esplika katak misaun husi ró ne’e atraka iha portu hotu-hotu maka atu fahe koñesimentu, tulun, no esperansa. “Ita-boot sira-nia nia juventude sai hanesan porsaun boot liu husi ita-boot nia populasaun. Iha tempu oportunidade di’ak ida-ne’e atu halibur ho ita iha atualizasaun koñesimentu. Ami mós buka hela ba oin atu aprende liután kona-ba ita-boot sira-nia reziliénsia, perseveransa no korajen fuan nian ba ukun-an no halo ema hotu mehi ba nasaun ida ne’ebé forte. Husi vizita ida-ne’e mós inspira ita-boot nia oan sira atu dezenvolve domin kle’an liután ba lee no aprendizajen”, dehan.
Jerente Doulos Hope, Nidhin Sebastian, hateten iha feira livru flutuante ne’e ko’alia kona-ba programa sira troka kulturál nian, inisiativa edukasionál sira, envolvimentu komunitáriu sira ne’ebé signifikativu no seluk tan.
Tuir nia, sira mai dala-ida tan iha Timor-Leste tanba país ne’e nia polítika esterna nu’udar nasaun viziña di’ak no laiha inimigu. “Ami agradese tebes tanba simu ona ami ho laran-di’ak. Ami hein katak durante ami-nia tempu iha ne’e nakonu ho enkorajamentu, mai ita aprende hamutuk fahe esperansa ba malu”, konklui.
Notísia relevante: Ró Doulos Hope vizita Timor-Leste hodi promove turizmu no feira livru
Jornalista: Arminda Fonseca
Editora: Maria Auxiliadora
