DILI, 16 Janeiru 2026 (TATOLI)—Prezidente Administrasaun Administrasaun Navegasaun Aérea Timor-Leste, Romualdo da Silva, informa funsionamentu iha terminál departure aeroportu Nicolau Lobato bele utiliza ona hodi atende pasajeiru sira-nia viajen tama no sai, hafoin Empreza Devita Group konklui projetu reabilitasaun ba terminál departure ne’e.
Notísia Relevante: Terminal departure aeroportu Komoro funsiona iha Janeiru
Nia hatutan, kondisaun real iha terminal departure ida-ne’e bele akumula pasajeiru kuaze ema hamutuk 200 to’o 260 ne’ebé mak sei utiliza terminal departure ne’e bainhira atu dezloka ba rai-li’ur.
“Nune’e ami fiar katak ho kondisaun real ne’e, pasajeiru sira bele uza terminal departure ida-ne’e ho fasilidade ne’ebé bele garante no asegura pasajeiru sira hein aviaun hodi hala’o viajen ba rai-li’ur,” Prezidente Administrasaun Administrasaun Navegasaun Aérea Timor-Leste, Romualdo da Silva, informa ba Agéncia Tatoli iha aeroportu Komoro, kinta (15 Outubru 2025) ne’e.
Nia dehan, ena hotu-hotu haree tinan hirak liubá kondisaun terminál departure iha aeroportu Komoro ne’e ladun di’ak atu fó atendimentu ba pasajeiru sira-nia viajen tama no sai.
“Ho ida-ne’e mak iha tinan kotuk iha koordenasaun husi Ministériu Transporte Komunikasaun ho KAFI deside katak presiza halo reabilitasaun ba terminál ida-ne’e, nune’e obra ne’e implementa husi empreza Devita Group ho orsamentu hamutuk millaun $1-resin,” nia dehan.
Reabilitasaun ne’e, tuir nia, la’ós de’it ba terminál departure maibé reabilita mós área arrivál nian inklui monta rede haleu aeroportu laran toma.
Enkuantu prosesu reabilitasaun ne’e la’ós konklui ona maibé ne’e fazeadamente empreza entrega ba ANATL hodi halo operasaun no empreza kontinua hala’o prosesu reabilitasaun ba iha arrivál nian.
Nia dehan, Fasilidade ne’ebé sira monta ba iha área departure nian hanesan kadeira, monta AC foun no monta mós koneksaun internet wifi ho gratuitamente, seluk tan mak fatin fuma sigaru nian no fulan ida tan sira sei estabelese mós kafetária ne’ebé ijiéne ba komsumidór no duty free (faan tua) inklui produtu lokál Timor nian.
“Tanba ne’e, ita tenke kria kondisaun ne’ebé di’ak atu pasajeiru estranjeiru sira mai karik bele sente dehan seguru no konfortavél bainhira hala’o viajen mai Timor,” nia dehan.
Aleinde ne’e, nia hatutan, publisidade sira-ne’ebé daudaun ne’e monta iha área terminál nian sei moderniza ba dijitalizasaun no sei hasai hotu publisidade manuál sira, tanba sei monta video drone iha área departure atu pasajeiru bele haree.
“Kona-ba fasilidade mákina X-rey nafatin uza mákina tuan hodi halo operasaun maibé ba oin sira sei koordena ho AACTL atu haree fali mákina ne’ebé modernu depende ba ami-nia orsamentu no programa ne’ebé iha. Tanba, bainhira obra ne’e konklui ona sei prevee mós pakote fasilidade iha terminál aeroportu,” nia dehan.
Jornalista : Alexandra da Costa
Editór : Cancio Ximenes
