Tinan 2025: MS transfere pasiente 122 halo tratamentu saúde iha rai-li’ur
DILI, 16 Janeiru 2026 (TATOLI)—Diretora Nasionál Apoiu Servisu Hospitalar iha Ministériu Saúde, Maria Santina de Jesus Gomes, hateten durante tinan 2025 nia laran ne’e Ministériu Saúde halo ona transferensia ba pasiente hamutuk 122 halo tratamentu saúde iha rai-liur’.
“Durane tinan 2025 ita halo transferensia ba pasiente sira ba rai-li’ur hamutuk 122. Husi númeru ne’e iha pasiente na’in-87 mak tratamentu hotu ona no pasiente ne’ebé mak sei kontinua halo tratamentu hamutuk 30,” Maria Santina de Jesus Gomes hateten ba jornalista sira iha nia kna’ar fatin, Kaikoli, ohin.
Nia informa, iha pasiente na’in-10 mak la kontinua ba halo tratamentu saúde iha rai-li’ur tanba kontaktu ba la simu ka la responde.
“Sira ne’ebé mak ami haruka ba rai-li’ur halo tratamentu ne’e la’ós ema boot de’it, maibé inklui mós ho labarik kiik idade tinan rua to’o 14 ne’ebé mak afeta ba moras kankru. Tanba nasaun Malazia labele halo tratamentu ba labarik sira no sira halo de’it ba ema boot, entaun kazu refere ami halo transferensia ba Singapura,” nia dehan.
Paisente sira-ne’e maióia moras kankru tuir mak moras fuan no agora pasiente ne’ebé mak mate iha rai-li’ur na’in-neen (6) no sira-ne’ebé mak fila mai tratamentu kontinuasaun iha ne’e mak mate hamutuk na’in-ualu (8).
Entertantu, ba tinan 2026, Diresaun Nasionál Servisu Hospitalár iha Ministériu Saúde prepara tan ona pasiente na’in-ualu (8) atu ba halo tratamentu saúde iha Malazia no Singapura.
Jornalista : Felicidade Ximenes
Editór : Cancio Ximenes
