DILI, 16 Janeiru 2026 (TATOLI)–Tribunál Judisiál Primeira Instánsia Dili (TJPID), Sesta ne’e, halo interrogatóriu dahuluk ba Reitór Universidade Nasionál Timor-Leste (UNTL), João Martins, Vise-Reitór inklui kargu xefia na’in-haat seluk.
Iha Interrogatóriu dahuluk ne’e, Ministériu Públiku (MP) ne’ebé reprezenta husi Prokuradór Matias Soares Promove ho krime abuzu poder, administrasaun danoza, pekulatu no falsifikasaun dokumentu.
Arguidu na’in-lima mak hanesan João Martins nu’udar Retór UNTL, arguidu FQdC ,TS nu’udar atuál Dekanu no arguidu MB nu’udar antigu Dekanu iha UNTL inklui arguida JMM, LSdA.
Durante prosesu ne’e, arguidu sira hili direitu ko’alia nune’e prosesu interrogatóriu dahuluk ba arguidu la’o kleur.
Nune’e, durante alegasaun, Prokuradór Matias Soares husu ba Tribunál atu aplika medida koasaun Proibisaun Auzénsia no Apreensaun Períodika ba arguidu João Martins inklui atuál Dekanu na’in-rua FQdC no TS.
Notísia relevante : PNTL detein Reitór no Vise UNTL inklui kargu xefia na’in-haat seluk
Enkuantu, antigu Dekanu ho inisiál MB no arguida JMM no LsdA, ne’ebé MP husu ba Tribunál atu aplika medida koasaun Aprezentasaun Períodika no Termu Identidade Rezisténsia (TIR).
Enkuantu, iha interrogatóriu dahuluk, Defeza husi arguidu na’in-lima husu ba Tribunál atu aplika de’it medida koasaun TIR.
Hafoin Tribunál liuhusi Juíz Titulár Argentino Nunes, rona tiha parte hotu iha alegasaun, deside liberta kedan arguidu tanba prazu ba detensaun arguidu sira ramata ona. Tanba ne’e Tribunál deside liberta sira.
Hafoin interrogatóriu dahuluk, Defeza husi arguidu sira, Advogadu Privadu Cancio Freitas, haktuir, Defeza sira husu TIR tanba defeza konsidera medida ne’e mak kiik liu husi medida koasaun sira ne’ebé iha.
Iha alegsaun, MP husu ba Tribunál atu aplika medida koasaun Proibisaun Auzénsia no medida koasaun Aprezentasaun Períodika.
“Ha’u husu TIR de’it, maibé Ministériu Públiku Aprezenta Períodika, ha’u admite tanba krime ne’ebé Ministériu Públiku promove mai Tribunál ne’e jerál de’it la justifika, iha arguidu sira deklarasaun mós laiha indísiu forte ba prejuízu ka prosesu ne’e la gasta osan,” Cancio Freitas hato’o ba Jornalista sira iha TJPID iha Kaikoli, Sesta ne’e.
Entertantu, Juíz Argentino Nunes enserra interogatóriu dahuluk ba arguidu sira no liberta arguidu sira bele fila ba idak-idak nia uma.
Nune’e, Tribunál deside Sábadu (17/01) aban mak foin hasai despaisu ba interrogatoriu ne’e.
Jornalista : Natalino Costa
Editora : Julia Chatarina
